સંજેલીના પીછોડા ગામે સ્થાનિક સમસ્યાના નિરાકરણ માટે રાત્રી સભા યોજાઈ

દાહોદઃ સંજેલી તાલુકાના પીછોડા ગામે કલેક્ટરની અધ્યક્ષતામાં રાત્રી સભા યોજાઇ હતી. જેમાં કડકડતી ઠંડીમાં પણ ગ્રામજનોએ ઉત્સાહપૂર્વ ભાગ લઇ પોતાના પ્રશ્નની રજૂઆત કરી હતી. જે અંગે કલેક્ટરે ગ્રામજનોની સમસ્યાનું વહેલી નિરાકરણ લાવવા માટે સંબધિત અધિકારીઓને આદેશ કર્યો હતો. આ સભામાં તાલુકાના પ્રાંત અધિકારી, મામલતદાર, તાલુકા વિકાસ અધિકારી, જિલ્લાના અધિકારીઓ, ગામના સંરપંચ સહિત ગ્રામજનોએ મોટી સંખ્યામાં હાજર રહ્યાં હતાં.

સંજેલી તાલુકાના પીછોડા ગામમાં જિલ્લા કલેક્ટરની અધ્યક્ષતામાં રાત્રી સભા યોજાઇ હતી. જેમાં વિવિધ વિભાગોના અધિકારીઓએ સરકારી યોજનાઓની માહિતી આપી હતી. ત્યારબાદ ગ્રામજનોએ ખેતી માટે વિજળી, આરોગ્ય સેન્ટરના રિનોવેશન, રસ્તા અને જમીનના પ્રશ્નો બાબતે રજૂઆત કરી હતી. જે અંગે જિલ્લા કલેક્ટરે સંબધિત અધિકારીઓને તાત્કાલિક નિવારણ લાવી રિપોર્ટ કરવા જણાવ્યું હતું.

જિલ્લા કલેક્ટરે ગ્રામજનોને સંબોધતાં જણાવ્યું હતું કે, "મહાત્વાકાંક્ષી જિલ્લા તરીકે આપણી મુખ્ય પ્રાથમિકતા આરોગ્ય છે. ખાસ કરીને માતાઓ અને બાળકોના આરોગ્ય બાબતે આપણે વિશેષ કાળજી રાખવાની જરૂર છે. આ માટે સગર્ભા માતાઓની નોંધણી વહેલામાં વહેલી તકે કરવી જરૂરી છે. કુપોષણને દૂર કરવા ગ્રામજનોએ પણ જાગૃત થવાની જરૂર છે."

ત્યારબાદ ખેડૂતોની સમસ્યા વિશે વાત કરતાં તેમણે કહ્યું હતું, કે," ખેડૂતો પોતાના ખેતરના નાનકડા ભાગમાં કુંટુંબ માટે લીલા પાંદડાવાળા શાકભાજી કરે તો પોષણની ઉણપ દૂર કરી શકાય છે. ખેડૂતોએ મકાઇ ઉપરાંત બાગાયતી પાકો, ઘઉં, બાજરી, સોયાબીન અને શાકભાજી પાકો કરવા જોઇએ. પશુપાલનને વૈકલ્પિક વ્યવસાય તરીકે અપનાવી આવક વધારવી જોઇએ."

આ ઉપરાંત તેમણે શિક્ષકોએ શિક્ષણની ગુણવત્તા સુધારવા અને પોતાના ગામને B ગ્રેડમાંથી A અને A+ ગ્રેડમાં લાવવા વિશેષ પ્રયાસો કરવા પર ભાર મુકયો હતો. તેમજ શાળામાં વિદ્યાર્થીઓની નિયમિતતા પણ જરૂરી હોવાનું જણાવ્યું હતું. ત્યારબાદ મનરેગા યોજનાના લાભાર્થીઓને જોબકાર્ડ અને આયુષ્યમાન ભારત યોજનાના લાભાર્થીઓને ગોલ્ડન કાર્ડનું વિતરણ કર્યુ હતું.