દાદરા નગર હવેલીમાં મેડિકલ કોલેજમાં પ્રવેશ પ્રક્રિયાનો પ્રારંભ, અંતિમ તારિખ 1 જૂલાઈ

સેલવાસ: સંઘપ્રદેશ દાદરા અને નગર હવેલીમાં 150 સીટની મેડિકલ કોલેજની મંજૂરી મળ્યા બાદ વર્ષ 2019 - 20 MBBSના પ્રથમ વર્ષની પ્રવેશપ્રક્રિયા તારીખ 27મી જૂનના ગુરુવારથી શરૂ થઈ છે. આ પ્રવેશ પ્રક્રિયા ઓનલાઈન માધ્યમથી કરવામાં આવશે. NEET UG કરી ચૂકેલા વિદ્યાર્થીઓ ત્રણ તબક્કામાં MBBSના પ્રથમ વર્ષમાં પ્રવેશ માટે ઓનલાઇન અરજી કરી પ્રવેશ મેળવી શકશે.

દાદરા નગર હવેલીમાં વડાપ્રધાન નરેન્દ્ર મોદીએ પોતાના હસ્તે ભૂમિપૂજન કરેલ મેડિકલ કોલેજમાં વર્ષ 2019-20ના પ્રથમ વર્ષ માટે પ્રવેશ પ્રક્રિયાનો 27મી જૂનથી પ્રારંભ કરાયો છે.મેડિકલ કોલેજમાં પ્રથમ વર્ષમાં MBBS માં પ્રવેશ મેળવનાર વિદ્યાર્થીઓ તેમની ઓફિસિયલ વેબસાઈટ http://vbch.dnh.nic.in/MedicalCollegeDNH/Home.aspx પર જઇ અરજી કરી શકે છે.

આ ઉપરાત પ્રવેશપ્રક્રિયા સંબંધી તમામ જાણકારી વેબસાઈટ પર ઉપલબ્ધ છે. આ કોલેજનું પ્રથમ સત્ર તારીખ 1લી ઓગસ્ટ 2019 થી કોલેજ નિયમિતરૂપે શરૂ થશે. તો કોલેજમાં MBBSના પ્રથમ વર્ષની પ્રવેશપ્રક્રિયા માટે 27મી જુન 2019થી ઓનલાઇન અરજી પ્રક્રિયા શરૂ થશે. જેની છેલ્લી તારીખ 1લી જુલાઇ રાખવામાં આવી છે. ઉલ્લેખનીય છે કે ઓનલાઇન અરજી કર્યા બાદ વિદ્યાર્થીઓના ડોક્યુમેન્ટ વેરિફિકેશન 28મી જૂન 2019 થી 2જી જુલાઈ 2019 સુધી મેડિકલ કોલેજ સાયલી ખાતે કરવામાં આવશે.

મેડિકલ કોલેજ

ત્રણ તબક્કાની આ પ્રવેશ પ્રક્રિયામાં પ્રથમ વર્ષ પાત્રતા ધરાવતા વિદ્યાર્થીઓની મેરિટ લિસ્ટ 7 જુલાઈ 2019 ના રોજ પ્રસિદ્ધ થશે.આ પ્રવેશ પ્રક્રિયા માં પ્રથમ તબક્કામાં સામેલ થવા માટે સહમતી પત્ર તારીખ 8મી જુલાઇથી 12મી જુલાઈ 2019 સુધી આપવું પડશે.તો પ્રથમ તબક્કામાં પસંદગી પામેલ વિદ્યાર્થીઓની યાદી 15મી જુલાઈએ પ્રસિદ્ધ થશે.અને તેમણે 15 જુલાઈથી ૧૮ મી જુલાઇ સુધી કોલેજમાં આવી પોતાની પ્રવેશપ્રક્રિયા પૂર્ણ કરવી પડશે.તો ખાલી પડેલી જગ્યા માટે બીજા તબક્કામાં સામેલ થવા માટે તારીખ 20 થી 22 મી જુલાઇ સુધી સહમતી પત્ર આપવા પડશે. બીજા તબક્કામાં પસંદગી પામેલા વિદ્યાર્થીઓની યાદી 23મી જુલાઈએ પ્રસિદ્ધ થશે. તથા 24થી 26 જુલાઈ સુધી કોલેજમાં આવી પ્રવેશપ્રક્રિયા પૂર્ણ કરવી પડશે.તો અંતિમ તબક્કામાં સામેલ થવા માટે 28મી જુલાઈ સુધી સહમતી પત્ર આપવું પડશે અને પસંદગી પામેલ વિદ્યાર્થીઓની યાદી 29મી જુલાઈએ પ્રસિદ્ધ થશે. તો પ્રવેશપ્રક્રિયા સંબંધિત કોઈપણ વધુ જાણકારી માટે નેશનલ મેડિકલ એજ્યુકેશન એન્ડ રિસર્ચ ઇન્સ્ટિટ્યુટ સાયલી તાલુકાના ડીન કાર્યાલયનો હેલ્પલાઇન નંબર 9081196661, 7624092991 પણ યાદીમાં આપવામાં આવ્યો છે. જેના પર સંપર્ક કરી શકાશે.

ઉલ્લેખનીય છે કે, સંઘપ્રદેશ દાદરા નગર હવેલી, દમણ અને દીવના વિદ્યાર્થીઓ માટે મોદી સરકારે આપેલી કોલેજમી ભેટ આ પ્રદેશના વિદ્યાર્થીઓ માટે ડોકટર બનવાના સપનાને સાકાર કરવા માટે અતિ મહત્વની ભેટ માનવામાં આવે છે. આ પહેલા આ વિસ્તારના વિદ્યાર્થીઓએ ગુજરાત કે અન્ય રાજ્યમાં તબીબી અભ્યાસ માટે જવું પડતું હતું. અને તેમાં પણ ગણતરીની જ સીટ તેમને મળતી હતી.