છોટાઉદેપુર જિલ્લાના નાગરિકોને કાનૂની સહાય તેમજ સરકારની વિવિધ યોજનાઓની સહાય એકજ સ્થળેથી મળી રહે તે માટે ગુજરાત રાજ્ય કાનૂની સેવા સત્તામંડળ અને છોટાઉદેપુર જિલ્લા કાનૂની સેવાસત્તા મંડળ દ્વારા લીગલ સર્વિસ કેમ્પનું આયોજન કરવામાં આવ્યું હતું. જેમાં ગુજરાત રાજ્યના હાઈકોર્ટના સિનિયર મોસ્ટ ન્યાયમુર્તિ એસ.આર.બ્રહ્મ્ભટ, આર.એમ છાયા અને ભાર્ગવ ડી કારિયા તેમજ જિલ્લા કલેક્ટર ઉપસ્થિત રહ્યા હતા.
જેમાં એસ આર બ્રહ્મભટે જણાવ્યું હતું કે, સામાન્ય માણસને ન્યાય પ્રક્રિયાનું જ્ઞાન હોતું નથી. સાધન પ્રસાધનના અભાવે જે ન્યાય નથી મેળવી શકતા એવા અદના માનવીને મદદ કરવા માટે રાષ્ટ્રીય કાનૂની સેવા સત્તામંડળ નવી દિલ્હીના માર્ગદર્શન હેઠળ રાજ્ય કાનૂની સેવાસત્તા મંડળ અને જિલ્લા તાલુકા કાનૂની સેવા સત્તામંડળોની સ્થાપના કરવામાં આવી છે.
આ મેગા લીગલ સર્વિસ કૅમ્પમાં છોટાઉદેપુર તાલુકાના 1004, જેતપુર તાલુકાના 434, સંખેડાના 483, ક્વોન્ટના 633, બોડેલીના 485, નસવાડીના 335 લાભાર્થી મળી કુલ 3,334ને વિવિધ યોજનાઓના લાભો ઉપસ્થિત મહાનુભાવો દ્વારા આપવામાં આવ્યો હતો. તેમજ જિલ્લા ન્યાયાલય ખાતે સંવેદનશીલ સાક્ષી જુબાની કેન્દ્રનું લોકાર્પણ કરવામાં આવ્યું હતું.
