દેશભરમાં દુષ્કર્મ જેવા અપરાધોનો આંક દિનપ્રતિદિન વધી રહ્યો છે. થોડા સમયમાં બનેલી દુષ્કર્મની ઘટનાઓથી દેશ અને રાજ્યભરમાં હાહાકાર મચ્યો છે. ત્યારે વધુ આવી એક દુષ્કર્મની ઘટના પ્રકાશમાં આવી છે. જેમાં ભાવનગરના પાલીતાણા પંથકમાં એક સગીરાને એકથી વધુ શખ્સો દ્વારા એક વર્ષ સુધી પોતાની હવસનો શિકાર બનાવી પોતાની ભૂખ સંતોષી હોવાનું જાણવા મળી રહ્યું છે.
આ ઘટનામાં સગીરાના પિતાએ પાલીતાણા રૂલર પોલીસ મથકમાં ત્રણ ઇસમો અને એક મહિલા વિરૂદ્ધ ફરિયાદ નોંધાવી છે. આ બનાવના પગલે પાલીતાણા ડીવાયએસપી સહિતનો પોલીસ કાફલો સગીરાને મેડીકલ ચેકઅપ માટે લઇ અને ભાવનગર સર.ટી. હોસ્પિટલ ખાતે નર્સિંગ વિભાગમાં પહોચ્યો હતો અને સગીરાનું મેડીકલ ચેકઅપ હાથ ધરવામાં આવ્યું છે. જયારે આ બનાવમાં પોલીસ ફરીયાદના આધારે પોલીસે ત્રણ શખ્સોની ધરપકડ કરી છે. જયારે હજુ એક મહિલા ફરાર છે.
પ્રાથમિક માહિતી મુજબ જે મહિલા આ દુષ્કર્મની ઘટનામાં સામેલ છે તે બીજી કોઈ નહિ પરંતુ સગીરાની માતા છે. એટલે કે માતાની હાજરીમાં સગીરા સાથે વારંવાર દુષ્કર્મ આચરવામાં આવ્યું છે, ત્યારે આ ઘટનામાં હજુ અનેક રહસ્યો બહાર આવે તેવુ લાગી રહ્યું છે. જેમાં સગીરાને ઘેન આપી તેની સાથે દુષ્કર્મ આચરવામાં આવ્યું હોય તેવી પણ વિગતો મળી રહી છે તો બીજી તરફ એવી વાતો પણ બહાર આવી છે કે, સગીરાના પિતાને ઘેન આપી માતા સગીર દીકરી સાથે દુષ્કર્મ કરાવતી હોવાનું પણ ચર્ચાય રહ્યું છે, ત્યારે સાચી હકીકત આ બનાવમાં શું છે તે તમામ આરોપીઓ ઝડપાઇ ગયા બાદ જ બહાર આવશે.
