આ બનાવની મળતી માહિતી મુજબ, સિહોર નજીક આવેલા ઘાંઘળી ગામમાં ખાર વિસ્તારમાં રહેતા અને મજૂરી કામ કરી પોતાનું ગુજરાન ચલાવતા સંજય પરમાર પરિવારના સભ્યો સાથે પોતાના ઘરે સુતા હતા. ત્યારે ગત મોડી રાત્રે લૂંટના ઇરાદે ચાર અજાણ્યા શખ્શો ઘરમાં પ્રવેશ્યા હતા. જેમાં સૌપ્રથમ અજાણ્યા શખ્સોએ સંજયની પત્ની રાધાબેન (ઉ.વ.૨૩) ને તેમની સાડી વડે બાંધી બંધક બનાવ્યા હતા. ત્યારબાદ તેમની નજર સામે જ તેમના પતિ સંજયભાઇ પર અજાણ્યા લૂંટારૂઓએ માથાના ભાગે જીવલેણ હુમલો કરતા ગંભીર ઇજાઓ થવાના કારણે તેમનું ઘટના સ્થળે જ મોત નીપજ્યું હતું.
જ્યારે અજાણ્યા લૂંટારૂઓએ ઘરમાં રાખેલા રૂ. ૮૫ હજારની કિંમતના સોના અને ચાંદીના દાગીના લૂંટી મૃત્તકના પત્નીને પણ ઇજાઓ પહોંચાડી તેણીને અને તેના બાળકોને જાનથી મારી નાખવાની ધમકી આપી નાસી છૂટયા હતા.
આ બનાવની જાણ થતા સિહોર પોલીસ કાફલો ઘટનાસ્થળે દોડી ગયો હતો અને મૃતક સંજયભાઈના મૃતદેહને પી.એમ.અર્થે ભાવનગરની સર. ટી. હોસ્પિટલ ખાતે ખસેડવામાં આવ્યો હતો. આ બનાવના પગલે મૃતકના પત્ની રાધાબેનને ચાર અજાણ્યા લૂંટારૂઓએ સામે તેના પતિની હત્યા કરી સોના ચાંદીના ઘરેણા લઈ ગયાની ફરિયાદ નોંધાવી હતી. પોલીસે ગુનો નોંધી આગળની વધુ તપાસ હાથ ધરી છે.
