ભરૂચના દહેજ બાયપાસ રોડ પર કન્સ્ટ્રકશન સાઈટમાં ભરાયેલ પાણીમાં ડૂબી જતા બે કિશોરનાં મોતનાં મામલામાં બિલ્ડર સામે કડક કાર્યવાહી અને વળતરની માંગ સાથે પરિવારજનોએ બંને કિશોરનાં મૃતદેહને શક્તિનાથ વિસ્તારમાં માર્ગ પર મૂકી વિરોધ નોધાવતા ચક્કાજામના દ્રશ્યો સર્જાયા હતા.બે કલાક બાદ પોલીસ અને મામલતદારની સમજાવટના કારણે મામલો થાળે પડ્યો હતો.
ભરૂચમાં કન્સ્ટ્રક્શન સાઈટ પર બે કિશોરના મોતનો મામલો, પરિવારે રસ્તા પર મૃતદેહ મૂકી ચક્કાજામ કર્યુ બિલ્ડર દ્વારા કન્સ્ટ્રકશન સાઈટ માટે ખોદકામ કરવામાં આવ્યુ હતું, જો કે બિલ્ડરનો પ્રોજકેટ કાયદાકીય આંટીઘૂંટીમાં અટવાતા આગળ કામ થઇ શક્યું ન હતું. ત્યારે આ ખુલ્લી જગ્યામાં મોટાપાયે વરસાદી પાણી ભરાયું હતું. રવિવારના રોજ આ પાણીમાં ડૂબી જતા ભરૂચની સાબુગર ઝુપડપટ્ટીમાં રહેતા ૧૫ વર્ષીય રાહુલ ઘીવાલા અને ગૌતમ ઘીવાલા નામના કિશોરના મોત નીપજ્યા હતા. ત્યારે આજે તેઓની અંતિમવિધિ પૂર્વે પરિવારજનો અને સ્થાનિકો બંનેનાં મૃતદેહ લઇ કલેકટર કચેરી નજીક આવેલ શક્તિનાથ વિસ્તારમાં પહોચ્યા હતા અને બંને મૃતદેહને માર્ગ પર મૂકી વિરોધ નોધાવ્યો હતો. સ્થાનિકોએ ચક્કાજામ કરતા બે કલાક સુધી ટ્રાફિકજામની પરિસ્થિતિ સર્જાઈ હતી. બિલ્ડરની બેદરકારીના કારણે આ ઘટના બની હોવાના આક્ષેપ કરવામાં આવ્યા હતા અને બિલ્ડર સામે કડક કાર્યવાહી તેમજ વળતરની માંગ કરવામાં આવી હતી.આખરે મામલતદાર પી.ડી.પટેલ અને પોલીસની સમજાવટ બાદ મામલો થાળે પડ્યો હતો અને પરિવારજનો બંને કિશોરના મૃતદેહને અંતિમવિધિ માટે લઇ ગયા હતા. તંત્ર દ્વારા મૃતક બાળકોના પરિવારજનોને કડક કાર્યવાહીની ખાતરી આપવામાં આવી છે.
