બનાસકાંઠા: એશિયાની નંબર વન બનાસડેરીની ચૂંટણીના હવે ફોર્મ ભરવાને હવે ગણતરીના દિવસો બાકી રહ્યાં છે ત્યારે, એક પછી એક ઉમેદવાર બનાસ ડેરીનું ફોર્મ ભરી રહ્યા છે. ખાસ કરીને બનાસડેરીની ચૂંટણીને લઈને બનાસકાંઠા જિલ્લામાં મોટું રાજકારણ જોવા મળી રહ્યું છે.
હાલમાં બનાસડેરીની ચૂંટણીમાં બનાસ ડેરીના ચેરમેન અને વાઇસ ચેરમેન આમને સામને છે, જેના કારણે અનેક મતદારો સહેલગાહે મોકલી દેવામાં આવ્યા છે. ખાસ કરીને જ્યારથી બનાસડેરીની ચૂંટણી જાહેર થઇ છે ત્યારથી મતદારોને રીઝવવા માટે બનાસડેરીના ચેરમેન શંકરભાઈ ચૌધરી અને વાઇસ ચેરમેન માવજીભાઇ દેસાઇ એડી ચોટીનું જોર લગાવી રહ્યા છે ત્યારે આજે બનાસડેરીની ચૂંટણીનું જાહેરનાસમુ પ્રસિદ્ધ થતાની સાથે જ રાજકીય સહકારી ક્ષેત્રે ભારે ગરમાવો આવી ગયો છે, ત્યારે 68 મતદારો ધરાવતી વાવ બનાસડેરીના ડિરેક્ટર પદે તારીખ 25 સપ્ટેમબરને 12.39 વાગ્યાના રોજ રાયમલભાઈ ચૌધરીએ ઉમેદવારી નોંધાવી હતી.
જોકે તારીખ 24 સપ્ટેમબરના રોજ બનાસડેરીના ચેરમેન શંકરભાઈ ચૌધરીએ વાવના મોરિખા ગામે અગત્યની મિટિંગ યોજાઈ હતી, જેમાં રાયમલભાઈ ચૌધરીના નામ ઉપર સર્વાનુમતે મહોર મારવામાં આવી હતી. 68 મતદારો ધરાવતી વાવ બનાસડેરીના ઉમેદવાર રાયમલભાઈ ચૌધરી સમર્થનમાં 66 મતદારો હાજર રહ્યા હતા જેથી એવું લાગી રહ્યું છે કે રાયમલભાઈ ચૌધરી ડિરેકટર પદે બિનહરીફ ચૂંટાઈ આવે છે.
હાલમાં બનાસડેરીની ચૂંટણીને લઇ બનાસકાંઠા જિલ્લામાં રાજકારણ ગરમાયું છે અને એક પછી એક બનાસડેરીની ચૂંટણીને લઇ વિવાદો પણ સર્જાયા હતા ત્યારે હવે જોવાનું એ રહેશે કે આગામી સમયમાં આ તમામ વિવાદો વચ્ચે કોના માટે બનાસ ડેરીનો તાજ આવે છે.
