- બનાસકાંઠા જિલ્લામાં ચાલુ વર્ષે 1,66,082 લાખ હેકટરમાં બાજરીનું વાવેતર
- કમોસમી વરસાદના કારણે બાજરીના પાકમાં ખેડૂતોને નુકસાન
- ડીસા માર્કેટયાર્ડમાં બાજરીની આવકમાં વધારો
ડીસા: બનાસકાંઠા જિલ્લામાં બાજરીનું સૌથી વધું વાવેતર થરાદ તાલુકામાં થાય છે. જેમાં બનાસકાંઠા જિલ્લામાં બાજરીનું ચાલુ વર્ષે 1 લાખ 66 હજાર જેટલું વાવેતર 82 હેકટર જમીનમાં થયું હતું. ત્યારે થરાદમાં સૌથી વધુ બાજરીનું 36 હજાર વાવેતર 959 હેકટર જમીનમાં કરવામાં આવ્યું છે. બનાસકાંઠા જિલ્લાના લોકો મુખ્યત્વે ખેતી અને પશુપાલન પર આધારિત છે. જેમાં આ વર્ષ જિલ્લામાં સારા પ્રમાણમાં ખેતી કરવામાં આવી છે. ત્યારે 2 લાખ 92 હજાર વાવેતર 543 હેક્ટર ઉનાળુ પાકોનું કરવામાં આવ્યું છે. જેમાં બાજરીનું વાવેતર બનાસકાંઠા જિલ્લામાં સૌથી વધારે કરવામાં આવ્યું છે. જે અંદાજે એક લાખ 66 હજાર 82 હેકટર જમીનમાં વાવણી કરવામાં આવી છે. ડીસા તાલુકામાં પણ આ વર્ષે ખેડૂતોએ સારા ભાવની આશાએ પોતાના ખેતરમાં મોટા પ્રમાણમાં બાજરીના પાકનું વાવેતર કર્યું હતું. પરંતુ છેલ્લા ઘણા સમયથી જે પ્રમાણે કુદરતી આપત્તિના કારણે ખેડૂતોને નુકસાન વેઠી રહ્યા છે તે પ્રમાણે ફરી એકવાર ખેડૂતોને બાજરીના પાકમાં નુકસાન વેઠવાનો વારો આવ્યો છે.
આ પણ વાંચો: સરસ્વતી તાલુકાના સરકારી ગોડાઉનમાં ટેકાના ભાવે બાજરી ખરીદીમાં વિવાદ
ખેડુતોને પાણીની સમસ્યા યથાવત
બનાસકાંઠા જિલ્લો રણ અને પર્વતીય વિસ્તાર ધરાવતો જિલ્લો છે. અપૂરતા વરસાદના કારણે જળાશયોમાં પાણીના ભરાવાથી લઈ ભૂગર્ભ કુવા અને બોર દિન-પ્રતિદિન ઊંડા જઇ રહ્યા છે, તેની સીધી અસર પશુપાલકો અને ખેતીના વ્યવસાય પર પડી રહી છે. જેમાં છેવાડાના વિસ્તારમાં નર્મદાની કેનાલ અને કેટલાક વિસ્તારોમાં જળાશયોમાંથી અને બોરવેલમાંથી સિંચાઇનું પાણી મળતા ખેડૂતો ખેતી કરી રહ્યા છે. ચાલુ વર્ષમાં અંદાજે બે લાખ 92 હજાર 543 હેક્ટર જમીનમાં ઉનાળુ પાકની વાવેતર કરવામાં આવ્યું છે. પરંતુ જે પ્રમાણે બનાસકાંઠા જિલ્લાના ખેડૂતો છેલ્લા બે વર્ષથી પાણીની અછત અનુભવી રહ્યા છે તેના કારણે ખેડૂતોને પોતાના પાકમાં પાણી વગર ભારે મુશ્કેલીનો સામનો કરવો પડી રહ્યો છે.
બાજરીના ભાવમાં ઘટાડો
ચાલુ વર્ષે ઉત્તર ગુજરાતમાં સૌથી વધુ બાજરીનું વાવેતર બનાસકાંઠા જિલ્લાના ખેડૂતોએ કર્યું છે, પરંતુ સતત કુદરતી આપત્તિઓને કારણે બનાસકાંઠા જિલ્લાના ખેડૂતોને બાજરીના પાકમાં નુકસાન વેઠવાનો વારો આવ્યો છે. આ વર્ષે બનાસકાંઠા જિલ્લાના ખેડૂતોને બાજરીના પાકમાં સારા ભાવ મળશે તેવી આશાએ મોંઘાદાટ બિયારણો લાવી પોતાના ખેતરોમાં મોટા પ્રમાણમાં બાજરીના પાકનું વાવેતર કર્યું હતું. પરંતુ બનાસકાંઠા જિલ્લામાં સતત ભારે પવન અને કમોસમી વરસાદના કારણે ફરી એકવાર બાજરીના પાકમાં મોટું નુકસાન વેઠવાનો વારો ખેડૂતોને આવ્યો છે. બનાસકાંઠા જિલ્લામાં જ્યારે બાજરીનો પાક તૈયાર થવાના આરે હતો ત્યારે બનાસકાંઠા જિલ્લામાં કમોસમી વરસાદ પડતાં બાજરીનો તમામ પાક વરસાદના પાણીના કારણે બગડી ગયો હતો અને જેના કારણે બનાસકાંઠા જિલ્લાની બાજરી જ્યારે બજારમાં વેચવા માટે આવે ત્યારે તેના ભાવમાં સતત ઘટાડો જોવા મળ્યો હતો જે બાજરીની માગ દેશમાં જ નહીં પરંતુ વિદેશમાં રહેતી હતી તે જ બાજરીનો ભાવ બનાસકાંઠા જિલ્લાના ખેડૂતોને હાલ રાતા પાણીએ રોવડાવી રહ્યો છે. જ્યારે ગત વર્ષે ખેડૂતોને આ સમયે 300થી પણ વધુ બાજરીના પાકમાં ભાવ મળતો હતો તે આ વર્ષે ઘટીને અઢીસો રૂપિયા જેટલો બાજરીનો ભાવ થઈ જતાં ખેડૂતોને મોટું નુકસાન થઈ રહ્યું છે.
આ પણ વાંચો: બાજરીના ભાવમાં વધારો થતાં ખેડૂતો ખુશખુશાલ
ડીસા માર્કેટયાર્ડમાં બાજરીની આવકમાં વધારો
ચાલુ વર્ષે બનાસકાંઠા જિલ્લાના ડીસા તાલુકામાં ઉનાળુ સીઝનના ખેડૂતોએ સૌથી વધુ બાજરીના પાકનું વાવેતર કર્યું હતું. દર વર્ષની જેમ આ વર્ષે પણ ખેડૂતોને બાજરીના પાકમાં સારા ભાવ મળી રહે તેવી આશા હતી જેના કારણે ખેડૂતોએ મોટા પ્રમાણમાં પોતાના ખેતરમાં મોંઘાદાટ બિયારણો લાવી બાજરીના પાકનું વાવેતર કર્યું હતું. પરંતુ કમોસમી વરસાદના કારણે ખેડૂતોની તમામ આશાઓ પર પાણી ફરી વળ્યું હતું અને જ્યારે ખેડૂતો બાજરી નીકળી ત્યારે મોટુ નુકશાન વેઠવાનો વારો આવ્યો હતો. ડીસા માર્કેટયાર્ડમાં ગત વર્ષની જેમ આ વર્ષે પણ શરૂઆતમાં જ મોટા પ્રમાણમાં બાજરીની આવક નોંધાઇ રહી છે. સતત વધતી જતી બાજરીની આવકના કારણે માર્કેટયાર્ડમાં ચારે બાજુ બાજરી જોવા મળી રહી છે. વેપારીઓ પણ સવારથી જ ખેડૂતો સાથે બાજરીની હરાજીમાં જોડાયેલા જોવા મળી રહ્યા છે, પરંતુ ગત વર્ષની સરખામણીમાં આ વર્ષે ખેડૂતોને ભાવમાં ઘટાડો થતાં ખેડૂતોમાં નારાજગી જોવા મળી રહી છે.
