બનાસકાંઠા: એશિયાની નંબર વન ગણાતી બનાસડેરીની ચૂંટણીના પડઘમ વાગી રહ્યા છે. આ ચૂંટણી યોજાય તે પેહલા જ બનાસડેરી પોતાના પક્ષને ફાયદો થાય તે મુજબ મંડળીમાં ઠરાવો કરાવવા માટે ધમપછાડા શરૂ કર્યા છે.
આજે વડગામની છાપી દૂધ મંડળીમાં બનાસ ડેરીની ચૂંટણીમાં મતદાન માટેના પ્રતિનિધિ નિમવા માટેની મિટિંગ રાખવામાં આવી હતી. તેમાં ઠરાવ કરી બનાસ ડેરીની ચૂંટણીમાં પ્રતિનિધિ નિમવાનો હતો. પરંતુ આ બેઠક યોજાઇ તે પૂર્વે જ છાપી દૂધ મંડળીના મંત્રી, ચેરમેન સહિત 5 સભ્યો દૂધ મંડળીના તમામ દસ્તાવેજ લઈ ફરાર થઈ ગયા હતા.
મંડળીના 11 સભ્યોમાંથી 6 સભ્યો હાજર રહેતા બહુમતી તેમના પક્ષે થવાની હોવાથી મંડળીના મંત્રી મોંઘજીભાઈ રતુભાઈ મોર ,ચેરમેન અભુભાઈ મુળજીભાઈ ચૌધરી સહિત 5 સભ્યો રેકર્ડ લઈ છૂમંતર થયા હોવાના આક્ષેપ સભાસદ અને સભ્યોએ કર્યા છે. આ સાથે તેમની સામે પોલીસ ફરિયાદ કરવાની તજવીજ પણ હાથ ધરાઈ છે.
