બનાસકાંઠા: એશિયાની સૌથી મોટી બનાસડેરીની ચૂંટણી ટૂંક સમયમાં યોજાનારી છે. જેમાં સત્તા મેળવાવા માટે સત્તાધીશો હવે એડીચોટીનું જોર લગાવી રહ્યાં છે. બનાસડેરીમાં અત્યારે ચેરમેન તરીકે શંકર ચૌધરી છે, જ્યારે વાઇસ ચેરમેન તરીકે માવજી દેસાઈ કામગીરી કરી રહ્યાં છે. એક સમયે એકબીજાના પૂરક ગણાતા બંને અત્યારે એકબીજાની સામે આવી ગયા છે. અત્યારે માવજી દેસાઈ અને શંકર ચૌધરી બંને એકબીજાનો હરાવવા માટે સામ, દામ, દંડ ભેદની નીતિ અપનાવી રહ્યાં છે.
રાજકીય મહત્વાકાંક્ષા સંતોષવા માટે શંકર ચૌધરી તેમની હરીફ મંડળીઓને અને હરીફ ઉમેદવારોની કટ ઓફ લિસ્ટ કરવા માટે પશુપાલકોનો કચ્ચરઘાણ વાળી રહ્યાં છે. અત્યારે બનાસડેરીમાં શંકર ચૌધરીના સૌથી મોટો વિરોધી જૂથ ગણાતું હોય તો, તે છે માવજી દેસાઈ ગ્રુપ છે.
માવજી દેસાઈ ડીસામાંથી બનાસ ડેરીના ડિરેક્ટર પદની ચૂંટણી લડવાના છે. ત્યારે માવજી દેસાઈ ડિરેક્ટર ન બને તે માટે હવે શંકર ચૌધરી પોતાની તમામ શક્તિઓનો ઉપયોગ કરી રહ્યાં છે. ડીસામાં બનાસ ડેરીના ડિરેક્ટર માટેના કુલ 130 મત છે. જેમાંથી 65 મત દેસાઈ મંડળીના એટલે કે, દેસાઈ સમાજ પાસે છે. જ્યારે બાકીની 65 મંડળીઓમાં તમામ સમાજના મત આવી જાય છે. આમ જોઈએ તો માવજીને હરાવવા અશક્ય છે, પરંતુ માવજીને પછાડવા માટે હવે શંકર ચૌધરી દેસાઇ ચૂંટણી મંડળીઓને ટાર્ગેટ કરી રહ્યાં છે. માવજીના અંગત અને વિશ્વાસુ ગણાતી મંડળીઓના મત બદલવાની કવાયત હાથ ધરી છે. જેમાં ડીસા તાલુકાના પેપળુ ગામે આવેલી દૂધ મંડળીમાં પણ ત્રણ દિવસ અગાઉ રાજકીય કિન્નાખોરી રાખી કવેરી ઊભી કરવામાં આવી હતી. તપાસ બાદ મંડળીને તાળાં મારી દીધા હતા.
પેપળુ મંડળીને તાળાં લાગતા જ અહીં દૂધ ભરાવતા પશુપાલકો રજળી પડ્યા હતા. દૂધ મંડળીમાં રોજનું 3 હજાર લિટર ભરાવે છે. પરંતુ ત્રણ દિવસથી મંડળી બંધ હોવાના કારણે પશુપાલકોએ તેમનું દૂધ રોડ પર ઢોળી દેવાની નોબત આવી છે. જેથી નુકસાનથી કંટાળેલા પશુપાલકોએ બનાસડેરીની કિન્નાખોરી સામે જાહેરમાં દૂધ ઢોળી વિરોધ દર્શાવ્યો હતો.
રાજકારણનો ભોગ બનેલી પેપળુ ગામની દૂધ મંડળીમાં 700થી પણ વધુ પશુપાલકો રોજનું ત્રણ હજાર ઉપરાંતનો દૂધ ભરાવે છે. આ ગામમાં મોટાભાગે લોકો પશુપાલન સાથે સંકળાયેલા છે. પરંતુ છેલ્લા ચાર દિવસથી અગમ્ય કારણોસર આ ડેરીમાં રાજકારણ ઉભુ કરી ડેરીને બંધ કરી દેવામાં આવી છે. જેના કારણે આ ગામના તમામ પશુપાલકો રજળી પડ્યા છે. છેલ્લા ઘણા વર્ષોથી આ ડેરીની સ્થાપના કરવામાં આવી છે.
આ ગામમાં એવા કેટલાય પરિવારો રહે છે કે, જેમનું ગુજરાન દૂધના ધંધા પર જોડાયેલું હતું, પરંતુ અચાનક ડેરી બંધ થઇ જતાં હાલ આ તમામ પરિવારોને પોતાના ઘરનું ગુજરાન ચલાવવું મુશ્કેલી બની રહ્યું છે. આ બાબતે ડેરીના ચેરમેન ગોવા દેસાઇએ જણાવ્યું હતું કે, અંગત રાજકારણના કારણે ડેરીની તાળાબંધી કરવામાં આવી છે. ત્યારે સત્વરે કોઈ પણ પક્ષપાત રાખ્યા વગર તાત્કાલિક ધોરણે આ ડેરી ખોલવામાં આવે તો આગામી સમયમાં આ ગામમાં 700 જેટલા પરિવારોને પોતાનું ગુજરાત સારી રીતે ચાલી શકે.
