ત્વિષાએ ISROમાં ઇન્ડિયન સ્પેસ ઓલમ્પિયાડ-2 ક્ષેત્રેની પરીક્ષામાં સમગ્ર ભારતમાં પ્રથમ ક્રમ પ્રાપ્ત કર્યો

અરવલ્લી જિલ્લાના મોડાસામાં અભ્યાસ કરતી અને મેઘરજ તાલુકાના ગોઢા ગામની વતની ત્વિષા ચૌધરીએ નોંધપાત્ર સિદ્વિ હાંસલ કરી છે. ત્વિષાએ ઈસરોમાં ઇન્ડિયન સ્પેસ ઓલમ્પિયાડ-2 ક્ષેત્રેની પરીક્ષામાં સમગ્ર ભારતમાં પ્રથમ ક્રમ પ્રાપ્ત કર્યો છે. અને ISRO દ્વારા યોજવામાં આવતી ટેડ એક્સ ઇવેન્ટમાં જૂનિયર સાયન્ટિસ્ટ તરીકે ઇન્ટરનેશનલ લેવલે ચર્ચા કરવા માટે આમંત્રણ મળ્યુ છે.

• ત્વિષાએ ઈસરોમાં ઇન્ડિયન સ્પેસ ઓલમ્પિયાડ-2 ક્ષેત્રેની પરીક્ષામાં સમગ્ર ભારતમાં પ્રથમ ક્રમ પ્રાપ્ત કર્યો
• ત્વિષાને ત્રણ વાર મળી હતી નિષ્ફળતા
• ઈસરો દ્વારા યોજવામાં આવતી ટેડ એક્સ ઇવેન્ટમાં જુનિયર સાયન્ટિસ્ટ તરીકે ઇન્ટરનેશનલ લેવલે ચર્ચા કરવા માટે આમંત્રણ મળ્યુ

અરવલ્લી : સ્વપ્ન તો દરેક જોતા હોય છે, પરંતુ તેને સાકાર કરવા માટે પરિશ્રમ જૂજ લોકો જ કરે છે. અરવલ્લી જિલ્લાના મોડાસામાં ધોરણ 12માં અભ્યાસ કરતી ત્વિષાએ તેને જોયેલા સ્વપ્ન સાકાર કર્યું છે. એક વાર નહીં બે વાર નહીં પરંતુ ત્રણ-ત્રણ વાર મળેલી નિષ્ફળતાને પણ ત્વિષાના વૈજ્ઞાનિક બનવાના મક્ક્મ મનોબળ પરાસ્ત ન કરી શકી. ત્વિષાએ ISROમાં ઇન્ડિયન સ્પેસ ઓલમ્પિયાડ-2 ક્ષેત્રેની પરીક્ષામાં સમગ્ર ભારતમાં પ્રથમ ક્રમ પ્રાપ્ત કર્યો છે. અડગ મનથી ત્વિષાએ પોતાના લક્ષાંક પર ધ્યાન કેન્દ્રીત કરીને સખત મહેનત દ્વારા આજે સફળતા મળી છે.

એક્ઝિબિશનમાં ઉપસ્થિત ISROના વૈજ્ઞાનિક પાસેથી પરીક્ષા વિષે માહિતી મેળવી હતી

ત્વિષા જણાવે છે કે, સૌપ્રથમ તે જ્યારે ધોરણ 5 અભ્યાસ કરતી હતી. ત્યારે તેને ISROની પરિક્ષા વિષે સાંભળ્યુ હતું. અમદાવાદ સાયન્સ સિટી દ્વારા ISROનું એક્ઝિબિશન યોજવામાં આવ્યું હતુ. જેમાં એક્ઝિબિશનમાં ઉપસ્થિત ISROમાં ફરજ બજાવી રહેલા વૈજ્ઞાનિક હાજર હતા. જેમની પાસે ત્વિષાએ આ પરીક્ષા અંગેની માહિતી મેળવી હતી.

ઇન્ડિયન સ્પેસ ઓલમ્પિયાડ ચંદ્રયાન-2નો લોન્ચિંગ ડિપાર્ટમેન્ટ ફાળવવામાં આવ્યો

ત્વિષા જણાવે છે કે, તેને પહેલા નેશનલ સ્પેસ સાયન્સની પરીક્ષા આપી હતી. જેમાં પાસ થવાથી ઈન્ડિયન સ્પેસ ઓલમ્પિયાડ માટે સિલેક્ટ થઇ હતી. ઈન્ડિયન સ્પેસ ઓલમ્પિયાડમાં ત્રણ વખત પરીક્ષા આપી હતી, પરંતુ સફળતા ન મળી. ત્યાર બાદ ધોરણ 11માં ફરીથી પ્રયાસ કરતા ઇન્ડિયન સ્પેસ ઓલમ્પિયાડની પરીક્ષામાં ગુજરાતમાં પ્રથમ નંબરે અને ભારતમાં દ્વિતીય ક્રમે આવી હતી. જે બાદ ઇન્ડિયન સ્પેસ ઓલમ્પિયાડ પ્રિલિમ્સની પરીક્ષા આપી હતી. આ પરિક્ષામાં માર્કિંગના આધારે 2020 બાદ યોજવામાં આવેલા પ્રોજેક્ટની વહેંચણી કરવામાં આવતી હોય છે. જેમાં તેને ચંદ્રયાન-2નો લોન્ચિંગ ડિપાર્ટમેન્ટ ફાળવવામાં આવ્યો હતો. તાજેતરમાં ઇન્ડિયન સ્પેસ ઓલમ્પિયાડ-2ની પરીક્ષા આપી હતી. જેનું રિઝલ્ટ 6 જાન્યુઆરીના રોજ જાહેર થયું હતું. જેમાં ભારતમાં તેને પ્રથમ ક્રમ પ્રાપ્ત કર્યો છે.

ઈસરો દ્વારા યોજવામાં આવતી ટેડ એક્સ ઇવેન્ટમાં જુનિયર સાયન્ટિસ્ટ તરીકે ઇન્ટરનેશનલ લેવલે ચર્ચા કરવા માટે આમંત્રણ મળ્યુ

ઇન્ડિયન સ્પેસ ઓલમ્પિયાડ મેઇન્સની પરીક્ષામાં સફળ થાય તો ISRO તરફથી જોબની ઓફર કરવામાં આવશે

હવે પછીના લક્ષ વિષે ત્વિષાએ વાત કરતા જણાવ્યુ હતું કે, હવે ઓગષ્ટ માસમાં ઇન્ડિયન સ્પેસ ઓલમ્પિયાડ મેઇન્સની પરીક્ષા લેવામાં આવશે. જો એમાં સફળ થાય તો તેને ISRO તરફથી જોબની ઓફર કરવામાં આવશે. જેમાં પ્રથમ ત્રણ વર્ષ સુધી તેને થિયરી એન્ડ પ્રેક્ટિકલ ટ્રેનિંગ આપવામાં આવશે અને ત્યારબાદ ISROમાં સિનિયર સાયન્ટિસ્ટ તરીકે પસંદ કરવામાં આવશે.

પિતા વિજ્ઞાનના શિક્ષક છે

ત્વિષાના પિતા જયેશભાઇ સરકારી શાળામાં વિજ્ઞાનના શિક્ષક છે. જ્યારે માતા હાઉસવાઇફ છે. નોંધનીય છે કે, તે ગુજરાતી માધ્યમની વિદ્યાર્થી છે.

સમગ્ર દેશમાંથી પ્રિલિમ્સની પરિક્ષા માટે 10 વિદ્યાથીઓ પસંદ કરવામાં આવે છે

ઇન્ડિયન સ્પેસ ઓલમ્પિયાડ પરિક્ષા દર બે વર્ષે યોજાતી હોય છે. સમગ્ર ભારતમાંથી 250ની આસપાસ વિદ્યાર્થીઓ અપ્લાય કરે છે. જેમાંથી 10 વિદ્યાર્થીઓની પસંદગી કરી તેમની કસોટી લેવામાં આવે છે. છેલ્લે 3 વિદ્યાર્થીઓને પસંદ કરવામાં આવે છે. ત્વિષાએ પરિશ્રમથી પ્રારબ્ધના દ્વાર ખોલી યુવાનોને સંદેશ આપ્યો છે કે, દરેક નિષ્ફળતા અંત નથી, પરંતુ સફળતા પહેલાનું અલ્પ વિરામ છે.