ધનસુરા પોલીસે બૂટલેગર યુવકને ઢોર માર મારતાં અનેક તર્કવિતર્ક

દારુબંધીવાળા ગાંધીના ગુજરાતમાં દારુનો વેપલો એવો ફૂલ્યોફાલ્યો છે કે રાજ્યના નાનાનાના કસબાઓ સુધી જીવનને હણી લેતું આ દૂષણ સમાજજીવનની ઘોરી નસમાં વ્યાપી વળ્યું છે. દારુના ધંધો કરનાર બૂટલેગર અને તેઓને પકડનાર રાજ્યનું પોલીસતંત્ર તાણાવાણાંની જેમ ગૂંથાયેલાં છે. ત્યારે પોલીસ કોઇ બૂટલેગરને માર મારી અધમૂઓ કરે તો અસંખ્ય સવાલો ખડાં થઈ જતાં હોય છે. અરવલ્લીમાં આવું બનતાં અનેક તર્કવિતર્ક ઊઠી રહ્યાં છે.

ધનસુરાઃ અરવલ્લી જિલ્લાના ધનસુરા નગરમાં પોલીસે બાતમીના આધારે ઠાકોરવાસમાં રહેતાં એક બૂટલેગરના રહેણાંકના મકાનમાં છાપો માર્યો હતો. બૂટલેગર સિદ્ધરાજસિંહ નટુભાઈ ખાંટ પાસેથી બે બોટલ વિદેશી દારૂ મળી આવ્યો હતો. જોકે બૂટલેગરને ઢોર માર મારતાં પરિવારજનોમાં રોષ વ્યાપ્યો છે.

અરવલ્લી જિલ્લાના ધનસુરાની ટાઉન પોલીસે બાતમીના આધારે ઠાકોરવાસ રહેતાં બૂટલેગર સિદ્ધરાજસિંહ ખાંટ મકાન પર છાપો માર્યો હતો. બૂટલેગરના પાસેથી બે બોટલ દારૂ માળી આવતાં પોલીસે વિદેશી દારૂની બોટલ ક્યાંથી મેળવી તે અંગે પૂછપરછ કરી હતી. પૂછપરછ દરમ્યાન પોલીસે ઢોર માર માર્યો હોવાનો પરિવારજનોએ આક્ષેપ કર્યો હતો. યુવકને ઇજાઓ થતા તેને ધનસુરા પી.એચ.સીમાં સારવાર અર્થે ખસેડવામાં આવ્યો હતો .પોલીસે પ્રોહિબિશન એક્ટ હેઠળ બૂટલેગર વિરૂદ્વ ગુનો નોંધ્યો છે. જો કે બે બોટલ દારૂ મળતાં બૂટલેગરને ગડદાપાટુનો માર મારવામાં આવતાં તર્કવિતર્ક સર્જાયાં છે.