મોડાસાના નેશનલ હાઇવે નં-8 પર ગમખ્વાર અકસ્માત, 4ના મોત

અરવલ્લીઃ જિલ્લાના મોડાસામાં આવેલાં દાવલી પાટિયા નજીક ડાયવર્ઝનના પગલે ટ્રક ચાલક અને રીક્ષા ચાલક ગફલત ખાઈ જતા ગમખ્વાર અકસ્માત સર્જાયો હતો. જેમાં 4 લોકોના ઘટના સ્થળે કમકમાટી ભર્યુ મોત થયું હતું. ઘટનાની જાણ સ્થાનિક પોલીસને થતાં ઘટનાસ્થળે પહોંચી કાયદેસરની કાર્યવાહી હાથ ધરી હતી.

મળતી માહિતી પ્રમાણે, સાબરકાંઠા તાલુકાના ઘઢી ગામના લોકો છકડો રિક્ષામાં દેવદિવાળી પર્વ નિમિત્તે શામળાજી મંદિરમાં દર્શન કરી પરત વતન ફરી રહ્યા હતાં. તે દરમિયાન નેશનલ.હાઇવે .નં-૮ પર દાવલી પાટિયા નજીક હિંમતનગર તરફથી આવતાં ટ્રક અને રિક્ષા વચ્ચે ગમખ્વાર અકસ્માત થયો હતો. જેમાં રિક્ષામાં સવાર એક મહિલા, પુરુષ અને બે બાળકોનું કમકમાટી ભર્યુ મોત થયું હતું. તેમજ અન્ય ૩ લોકોને ગંભીર ઈજાઓ પહોંચતા તેમને સારવાર અર્થે હિંમતનગર સિવિલ હૉસ્પિટલ ખાતે ખસેડાયા હતાં.

અકસ્માતના પગલે નેશનલ હાઇવે નં-8 પર ટ્રાફિકજામ સર્જાયો હતો. ઘટનાની જાણ થતાં મોડાસા રૂરલ પોલીસે ઘટનાસ્થળે પહોચી હતી અને મૃતદેહને પોસ્ટમોર્ટમ અર્થે ખસેડી કાયદેસરની કાર્યવાહી હાથધરી હતી.