- મોડાસા નગરપાલિકાની 12 કર્મચારીની ભરતી રદ
- 2014માં નગરપાલિકા નિયામક દ્વારા સીધી ભરતીથી કર્મચારીઓની ભરતી કરાઈ હતી
- ભરતી રદ કરવાનો વટ હુકમ કરતા નગરપાલિકામાં સન્નાટો છવાઈ ગયો હતો
અરવલ્લી : મોડાસા નગરપાલિકામાં વર્ષ 2014માં નગરપાલિકા નિયામક દ્વારા સીધી ભરતીથી કર્મચારીઓની ભરતી કરવા મંજૂરી આપવામાં આવી હતી. જોકે ભરતી નિયમ વિરુદ્ધ મોડાસાના નગરપાલિકાના સત્તાધિશોએ 12 કર્મચારીઓની ભરતી કરી હતી. જેને જે તે વખતે તત્કાલીન જિલ્લા કલેક્ટર રદ કરી હતી. વિવાદીઓની અપીલમાં જતા રાજ્ય શહેરી વિકાસ વિભાગના અપીલ અધિકારીએ ભરતી યથાવત રાખી, કલેક્ટરના હુકમને રદ કરી, હુકમની પુન: ચકાસણીનો આદેશ કર્યો હતો. તપાસના અંતે મોડાસા નગરપાલિકાએ કરેલી 12 કર્મચારીઓની ભરતી સરકારના પરીપત્ર અને ઠરાવનો યોગ્ય અમલ થયો ન હોવાનું જણાવી પ્રાદેશીક કમિશ્નર નગરપાલિકા ગાંધીનગર કમિશ્નર અમીત પ્રકાશ યાદવે ભરતી રદ કરવાનો વટ હુકમ કરતા નગરપાલિકામાં સન્નાટો છવાઈ ગયો હતો.
સેનેટરી ઇન્સ્પેક્ટર, ફાયર ઓફિસર, ટાઉન પ્લાનર, ટેકનિકલ આસીસ્ટન્ટ,સહિત 12 કર્મચારીઓની ભરતી કરાઈ હતી
વર્ષ-2012માં 77 જગ્યાઓ ભરવા મોડાસા નગરપાલિકાને, રાજ્ય નગરપાલિકા નિયામકે મંજૂરી આપી હતી. જેના આધારે જરૂરી ઠરાવ બાદ, પસંદગી સમિતિ દ્વારા ભરતી પ્રક્રિયા હાથ ધરવામાં આવી હતી. જેમાં સેનેટરી ઇન્સ્પેક્ટર, ફાયર ઓફિસર, ટાઉન પ્લાનર, ટેકનિકલ આસીસ્ટન્ટ, સહિત 12 કર્મચારીઓની ભરતીને મંજૂરી આપવા જિલ્લા કલેક્ટરને દરખાસ્ત કરાઇ હતી. જોકે કલેક્ટરે આ અંગે બે વર્ષ સુધી મંજૂરી ન આપતા, પાલિકાના તત્કાલીન પ્રમુખે પોતાની સહી દ્વારા ભરતી કરી નાખી હતી.
આ પણ વાંચો: અરવલ્લીની પોલીસે માસ્ક નહી પહેરનારા પાસેથી 40 લાખથી વધુનો દંડ વસૂલ્યો
ભરતી વિરૂદ્વ અધિનિયમ કલમ 258 હેઠળ ત્રણ અરજદારોએ ડિવિઝનલ મેજિસ્ટ્રેટ અરવલ્લીની કોર્ટમાં અરજી
આ બાબતે અન્ય અરજદારોએ વિરોધ કર્યો હતો અને અધિનિયમ કલમ 258 હેઠળ ત્રણ અરજદારોએ ડિવિઝનલ મેજિસ્ટ્રેટ અરવલ્લીની કોર્ટમાં અરજી કરી હતી. અરવલ્લી જિલ્લા કલેક્ટર અને ડિવિઝનલ મેજિસ્ટ્રેટ બી.જે.ભટ્ટની કોર્ટે, 2014માં ભરતી પ્રક્રીયા રદ કરી હતી. જોકે વિવાદીઓ અપીલમાં જતા રાજ્ય શહેરી વિકાસ વિભાગના અપીલ અધિકારીએ ભરતી યથાવત રાખી, કલેક્ટરના હુકમને રદ કરી, હુકમની પુન: ચકાસણીનો આદેશ કર્યો હતો. જે બાદ નગરપાલિકાની ભરતીને જુદી જુદી કોર્ટમાં પડકારવામાં આવી હતી.
આ પણ વાંચો: જાણો કઈ રીતે મેળવી શકાય છે Online Death Certificate
પ્રાદેશિક કમિશ્નર નગરપાલિકા ગાંધીનગર કમિશ્નર અમીત પ્રકાશ યાદવે ભરતી રદ કરવાનો વટ હુકમ કર્યો
પ્રાદેશીક કમિશ્નર નગરપાલિકા ગાંધીનગર અમીત પ્રકાશ યાદવે ભરતી રદ કરવાનો વટ હુકમ કર્યો છે. જેમાં જણાવ્યું છે કે, મોડાસા નગરપાલિકાએ કરેલી 12 કર્મચારીઓની ભરતી પ્રક્રિયામાં સરકારના પરીપત્ર અને ઠરાવનો યોગ્ય અમલ થયો નથી. જોકે આ હુકમ સામે 30 દિવસમાં અપીલ કરવાની જોગવાઈ હોવાનો ઉલ્લેખ હોવાથી કર્મચારીઓએ હાશકારો અનુભવી અપીલમાં જવા તૈયારીઓ હાથધરી હોવાની માહીતી પ્રાપ્ત થઇ હતી.
