કોરોનાને માત આપી ફરીથી મહામારી સામે જંગ લડવા તૈયાર છે આ લેબ ટેકનીશયન

કોઇ પણ વાઇરસથી સંક્રમણનું ભય સૌથી પહેલા આરોગ્ય કર્મીઓને હોય છે. તેમ છતાં કોરાનાની મહામારી વચ્ચે આરોગ્ય કર્મીઓ સતત યોદ્ધા બનીને પોતાની ફરજ અદા કરતા રહ્યા છે. અરવલ્લી જિલ્લાના ફરજ બજાવતા એક લેબ ટેકનીશયન પોતે કોરોનામાં સપડાયા હતા. જોકે સારવાર લીધા બાદ સ્વસ્થ થયા અને ફરીથી કોરોના વોરિયર બની કોરોના સામે જંગ લડવા ફરજ પર હાજર થયા છે.

અરવલ્લી : મોડાસા અર્બેન હેલ્થ સેન્ટરમાં લેબ ટેક્નિશિયન તરીકે ફરજ બજાવતા ફૈઝ ઇપ્રોલિયા, કર્મ પ્રત્યેની નિષ્ઠાના કારણે કોરોનાની મહામારીમાં પણ પોતાના 16 માસના બાળકને પોતાનીથી અલગ કરીને ફરજ પર નિયમત હાજર રહેતા હતા. જ્યારે સામાન્ય લોકોને પરિવારજનોની ચિંતા સતાવી રહી હતી, ત્યારે તેઓ પોતાના પરિવારની ચીંતા કર્યા વિના પોતાની ફરજ નિભાવી રહ્યા હતા. મોડાસામાં કોરોનાનું સંક્રમણ વધતા તકેદારી રાખી હોવા છતાં સંક્રમીત થયા ત્યારે તેમના માટે આઘાતજનક હતું. પોતાનો પરિવાર છોડી તેઓ મોડાસાની કોવિડ હોસ્પિટલમાં ઇલાજ માટે ભરતી થયા હતા.

કોરોનાને માત આપી ફરીથી મહામારી સામે જંગ લડવા તૈયાર

દ્રઢ મનોબળના પરિણામે માત્ર દસ દિવસમાં સ્વસ્થ થયા બાદ ફૈઝ હિંમત હાર્યા વિના ફરીથી લોકોની સેવા માટે સજ્જ થઇ ગયા છે. કપરા સમયે સાથ અને સહકાર આપવા બદલ તેઓ પોતાના માતા-પિતા, પતિ અને સાસુ-સસરાનો આભાર માને છે.

વર્તમાન પરિસ્થિતિમાં કોરોના ભયના પગલે જ્યારે મોટા ભાગની કોર્પોરેટ ઓફીસમાં વર્ક ફ્રોમ હોમ અમલમાં મુકવમાં આવ્યુ છે, ત્યારે ફૈઝ જેવા કેટલાક આરોગ્ય કર્મીઓ ગ્રાઉન્ડ ઝીરો પર કોરોના વાઇરસ જેવા દુશ્મન સામે જંગ લડી રહ્યા છે, ત્યારે જ તો તેમને કોરોના યોદ્વાનું ઉપનામ આપવામાં આવ્યું છે.