- અરવલ્લીમાં ફાયર NOC માટેનો કેમ્પ યોજાયો
- મોડાસા અને બાયડમાં 80 ટકા એકમોમાં ફાયર સેફ્ટીના સાધનોનો અભાવ
- NOC મેળવવા માટે કરેલી અરજીઓની કરાઇ સમીક્ષા
અરવલ્લી : રાજ્યમાં આગજનીની વધતી જતી ઘટનાઓને ધ્યાનમાં રાખીને સરકાર દ્વારા તમામ શાળાઓ, કોલેજીસ, હોસ્પિટલ્સ અને કોમ્લેક્ષીસમાં ફાયર સેફ્ટીના પૂરતા સાધનો લગાવવાનું ફરજિયાત કરવામાં આવ્યું છે. આ મામલે ગુજરાત હાઇકોર્ટના કડક વલણ બાદ, રાજ્યના તમામ જિલ્લાઓમાં ફાયર NOC અંગેના કેમ્પ યોજવામાં આવી રહ્યા છે, જે અંતર્ગત અરવલ્લીમાં પણ મોડાસા નગરપાલિકા ખાતે કેમ્પનું આયોજન કરવામાં આવ્યુ હતું.
આ પણ વાંચો - ફાયર વિભાગે 10 શાળાઓ કરી સીલ
યોગ્ય પુરાવા સાથેની અરજીઓનો સ્થળ પર જ નિકાલ કરવામાં આવ્યો
આ કેમ્પમાં મોડાસા અને બાયડ નગરપાલિકાઓની હદ વિસ્તારમાં આવતા શાળા-કોલેજ, હોસ્પિટલ્સ અને કોમ્લેક્ષીસના હોદ્દેદારો અને કર્મચારીઓ ઉપસ્થિત રહ્યા હતા. આ કેમ્પમાં પ્રાદેશિક કમિશનર કચેરીના અધિકારીઓએ NOC મેળવવા માટે કરેલી અરજીઓની સમીક્ષા કરી હતી અને યોગ્ય પુરાવા સાથેની અરજીઓનો સ્થળ પર જ નિકાલ કરવામાં આવ્યો હતો.
આ પણ વાંચો - કોરોના વોરિયર્સ તરીકે સુરત ફાયર વિભાગ પણ અગ્રેસર રહ્યું
NOC નહીં તો 15 એપ્રિલ બાદ એકમને સીલ કરશે
નોધનીય છે કે, NOC ન મેળવી હોય તેવા એકમોને 15 એપ્રિલ બાદ સક્ષમ અધિકારી દ્વારા સીલ કરવામાં આવશે, તેવી ચેતવણી પણ આપવામાં આવી છે. જો કે, મોડાસા અને બાયડમાં 80 ટકા એકમોમાં ફાયર સેફ્ટીના સાધનો લગાવામાં આવ્યા નથી અને કેટલાક એકમોમાં ગીચ વિસ્તારમાં હોવાથી સાધનો લગાવાની જગ્યા પણ નથી, ત્યારે સીલ કરવા અંગેની નોટીસનું કેટલુ પાલન થાય છે, કે પછી વ્હલાદવલાની નિતી અપનાવવામાં આવશે, તે તો આવનારા સમય જ બતાવશે.
આ પણ વાંચો - અરવલ્લીની પાલિકાઓ માટે મોડાસામાં ફાયર NOCનાં આયોજન કેમ્પ યોજાશે
