અરવલ્લીઃ જિલ્લાના માલપુર તાલુકાના હેલોદર ગામમા 15 ઓગસ્ટની વહેલી સવારે હડમતીયા નદીના પાળે વિક્રમભાઈ અને મનુભાઈ નામના પિતરાઈ ભાઈના મૃતદેહ મળી આવ્યા હતા. બન્ને ભાઇઓને તીક્ષ્ણ હથિયાર વડે ઇજાઓ પહોંચાડી મોતને ઘાટ ઉતરવામાં આવ્યા હતા. પુરાવાનો નાશ કરવાના ઇરાદે બન્નેના મૃતદેહ ખાલી તળાવમાં આવેલા બેટ ઉપર લઇ જઇ નાખી દીધા હતા.
અરવલ્લી પોલીસે ગણતરીના કલાકોમાં ઉક્લેયો ડબલ મર્ડર મિસ્ટ્રીનો ભેદ
ગુનાની ગંભીરતાને ધ્યાને લઇને જિલ્લા પોલીસ દ્વારા તપાસના ચક્રો ગતીમાન કર્યા હતા. જિલ્લા LCB, SOG, મોડાસા સર્કલ પોલીસ અને માલપુર પોલીસની ટીમએ ગણતરીના કલાકોમાં જ ચાર આરોપીને ઝડપી પાડ્યા છે. મૃતક વિક્રમભાઇના આરોપી બાબુભાઇની પત્ની સાથે આડા સંબધો હોવાને લઇને હત્યા કરવામાં આવી હોવાનું પોલીસે જણાવ્યુ હતું . હાલ એક આરોપી ફરાર છે જેને પકડવા પોલીસએ કાર્યવાહી હાથ ધરી છે.
