- ચાલકે સ્ટેરીંગ પરથી કાબુ ગુમાવતા નેત્રમ CCTV પોલ સાથે ટકરાઈ
- કારમાં બેસેલા બન્ને યુવકોંના ઘટનાસ્થળે મોત નિપજ્યા
- પૂરઝડપે ચાલતી કારના દ્રશ્યો CCTVમાં કેદ થયા હતા
અરવલ્લી: જિલ્લાના મુખ્ય મથક મોડાસામાં શુક્રવારના રોજ ગમખ્વાર અકસ્મતામાં 2 યુવકોએ જીવ ગુમાવ્યો હતો. જિલ્લાના ભિલોડા તાલુકાના કંથારીયા ગામે એક વૃદ્વ કોરોનાગ્રસ્ત થતા બાદ, તેમનો દિકરો અને મિત્ર માનસીક તણાવને કારણે કાર પૂરઝડપે ચલાવીને ઓક્સિજનની શોધમાં નિકળ્યા હતા. ત્યારે, મોડાસા બાયપાસ માર્ગ પર મેઘરજ રોડ ચોકડી નજીક નેત્રમના CCTV કેમેરાના પોલ સાથે ધડાકાભેર અથડાઇ હતી. નેત્રમના પોલ સાથે કાર ભટકાયા બાદ કાર ચાલક અને તેના મિત્રનું ઘટના સ્થળે મોત નિપજ્યુ હતું. આ સમગ્ર ઘટના CCTVમાં કેદ થઇ હતી.
આ પણ વાંચો: મોડાસા મામલતદાર કચેરીની મહિલા કર્મચારી કોરોનાગ્રસ્ત થતા કર્મચારીઓના રેપીડ ટેસ્ટ કરાયા
બન્ને યુવકોંના ઘટનાસ્થળે મોત નિપજ્યા
અરવલ્લી જિલ્લાના ભિલોડા તાલુકાના કંથારિયા ગામના ધવલના પિતા કોરોનાગ્રસ્ત થતા હતા. આથી, તેમને ઓક્સિજન તાત્કાલીક જરૂર પડતા ધવલ અને તેનો મિત્ર રોનક બન્ને ઓક્સિજન મેળવવા દોડી રહ્યા હતા. આથી, ઓક્સિજનની શોધમાં બન્ને યુવકો કાર લઇને મોડાસાની સહયોગ ચોકડી તરફથી પૂરપાટ ઝડપે આવી રહ્યા હતા. આ દરમિયાન, બાયપાસ માર્ગની મેઘરજ રોડ ચોકડીએ કાર ચાલકે સ્ટેરીંગ પરથી કાબૂ ગુમાવતા અકસ્માત નડયો હતો. પૂરઝડપે આવતી કાર રોડસાઈડના નેત્રમ CCTV પોલ સાથે ધડાકાભેર ટકરાઈ હતી. જેમાં બન્ને યુવકોંના ઘટનાસ્થળે મોત નિપજ્યા હતા. બન્ને યુવકોના અચાનક મોતથી પરિવારજનોમાં ભારે આક્રંદ છવાયો હતો.
આ પણ વાંચો: ધનસુરા-બાયડ રોડ પર કાર અને બાઇક વચ્ચે અકસ્માત સર્જાયો, 1નું મોત
યુવકોના મૃતદેહો ક્રેન અને કટરની મદદથી બહાર કાઢયા
વીજપોલ સાથે ધડાકાભેર અથડાયા પછી કારનો કડૂચલો વળી ઉંધા માથે થાંભલે લટકી રહી હતી. આથી, બન્ને યુવકોના મૃતદેહો ક્રેન અને કટરની મદદથી ભારે જહેમત બાદ બહાર કાઢવામાં આવ્યા હતા. અકસ્માતની ઘટનાના પગલે મોડાસા ગ્રામ્ય પોલીસે ઘટના સ્થળે પહોંચી વધુ કાર્યવાહી હાથ ધરી હતી.
