- અમુલની 74મી સામાન્ય સભા ઓનલાઇન મળી
- કોવિડના કારણે અલગ-અલગ 12 સ્થળોથી જોડાયા સભાસદો
- દૈનિક 113 કરોડનું દૂધનું અમુલે કર્યું સંપાદન
- મહામરી વચ્ચે ઐતિહાસિક વૃદ્ધિ સાથે ટર્નઓવર 7874 કરોડને પાર
- ગત વર્ષ ની સરખામણી માં 13 ટકા વૃદ્ધિ નોંધાવી
આણંદઃ કોરોના વાઈરસના સંક્રમણના ખતરાને ધ્યાનમાં લઈ અમુલ ડેરીની 74મી વાર્ષિક સાધારણ સભા 23મી જાન્યુઆરી 2021ના રોજ અલગ-અલગ 12 સ્થળો (આણંદ, બોરસદ, નડિયાદ, બાલાસિનોર, કઠલાલ, કપડવંજ, વીરપુર, ઠાસરા, માતર, મહેમદાવાદ, રાલેજ અને રંગાઈપુરા) પર ઓનલાઈન યોજવામાં આવી. અમુલ ડેરીના ચેરમેન રામસિંહ પરમારે અમુલ ડેરીને મળેલી મોટી સફળતા માટે સરદાર વલ્લભભાઈ પટેલ, મોરારજી દેસાઈ, ત્રિભુવનદાસ પટેલ અને ડો. વર્ગીસ કુરિયનને યાદ કરી તેમણે અમુલ માટે આપેલ નિ:સ્વાર્થ યોગદાન બદલ આભાર વ્યક્ત કર્યો હતો. તેમણએ નિયામક મંડળના સાથી મિત્રો, દૂધ મંડળીઓના પ્રતિનિધિઓ, સંઘના અધિકારી અને કર્મચારી ભાઈઓ અને બહેનોનું ઓનલાઈન વાર્ષિક સાધારણ સભામાં હાર્દિક સ્વાગત કર્યું હતું.
વિકટ પરિસ્થિતિમાં પણ દુધ સંપાદન યથાવત
આ પ્રસંગે રામસિંહ પરમારે જણાવ્યું કે, કોરોનાના સમયમાં જ્યારે મોટાભાગના ધંધાઓ / વ્યવસાયો અને રોજગારી બંધ હતા ત્યારે અમુલ ડેરીએ લગભગ 6 લાખ દૂધ ઉત્પાદકોના હિતને ધ્યાનમાં રાખીને દૂધ સંપાદનનું કાર્ય જાળવી રાખી દૂધ ઉત્પાદકોને તેમણે આપેલા દૂધનું પૂરેપૂરું વળતર ચૂકવેલ છે. કોરોનાની આવી પડેલી વિકટ પરિસ્થિતિનો સામનો કરી દેશમાં જ્યારે સંપૂર્ણ લોકડાઉન હતું ત્યારે અમૂલે દૂધ સંપાદન તેમજ દૂધ પ્રોસેસિંગનું કાર્ય અવિરત જાળવી રાખેલ હતું. સાથે સાથે અમુલ ડેરીએ વિકટ પરિસ્થિતિમાં સંઘ સંકલિત દૂધ મંડળીના તમામ સભાસદોને 1 લિટર તેલ અને 2 કિલો ઘઉંના લોટની રાહત કીટનું વિતરણ કરેલ હતું. મંડળીઓ સુધી સેનિટાઈઝર અને માસ્ક પણ સંઘ દ્વારા પહોંચાડવામાં આવ્યા હતા. સોશ્યલ ડિસ્ટન્સિંગથી દૂધ ઉત્પાદન કરવાની કાર્ય પદ્ઘતિ મંડળીઓના કર્મચારીઓને સમજાવવામાં આવી હતી. દરેક સભાસદોનું, ચેરમેન તેમજ કર્મચારીઓએ સંયમપૂર્વક તેમજ ધીરજ ધરી અવિરત દૂધ મંડળીઓએ દૂધ સંપાદન ચાલુ રાખ્યુ છે જે બદલ તેઓએ બધાનો આભાર માન્યો હતો.
અમુલની 74મી વાર્ષિક સાધારણ સભામાં તમામ દૂધ મંડળીઓના દૂધ ઉત્પાદકો અલગ-અલગ સ્થળો પર યોજવામાં આવેલા ઓનલાઈન વાર્ષિક સાધારણ સભામાં હાજર રહીને બધા જ એજન્ડાનો શાંતિપૂર્વક નિકાલ કર્યો હતો. વધુમાં રામસિંહ પરમારે વાર્ષિક સાધારણ સભાના સંબોધનમાં જણાવ્યું હતું કે, વર્ષ 2019-2020 આંતરરાષ્ટ્રીય ડેરી વેપાર માટે ખૂબ જ કપરું રહેલ તેમ છતાં સંઘનો ઉથલો રૂપિયા 7874 કરોડને પાર કરી ગયો છે, જે સંઘના ઈતિહાસમાં સર્વાધિક છે, જે ગત વર્ષના રૂપિયા 6966 કરોડની તુલનામાં ધંધામાં કુલ 13 ટકા વૃદ્ઘિ દર્શાવે છે.
તેમણે વધુમાં જણાવ્યું કે,આપણા માટે ખૂબ જ સંતોષની વાત છે કે ચાલુ વર્ષે ગત વર્ષના 747.83 ની સરખામણીમાં 811 જેટલો પોષણક્ષમ દૂધનો ભાવ આપી શક્યા છીએ. સંઘે વર્ષ 2019-2020 દરમ્યાન સરેરાશ 31 લાખ કિ.ગ્રા. પ્રતિદિન લેખે 113 કરોડ કિ.ગ્રા. ગુણવત્તાસભર દૂધ સંપાદન કરેલ છે. તેઓએ નિયામક મંડળના સભ્યો તેમજ હાજર રહેલ દૂધ ઉત્પાદકોને આરડામાં થયેલ કામો વિશે જાણકારી આપી હતી. આ ઉપરાંત સંઘ દ્વારા દૂધ અને દહીંની વધતી જતી બજાર માંગને ધ્યાનમાં લઈ સંઘે દૂધ પ્રોસેસિંગની ક્ષમતા 26 લાખ લિટર પ્રતિદિન હતી. જેને વધારી 36 લાખ લિટર પ્રતિદિન કરવામાં આવ્યાનું જણાવ્યું હતું.
ચીઝ બનાવવા માટે પ્લાન્ટનું વિસ્તૃતિકરણ કરવામાં આવશે
વધુમાં ચેરમેને ભવિષ્યના કામો વિશે જણાવ્યું હતું કે, કલકત્તા ખાતે અદ્યતન ડેરી પ્લાન્ટ - માટે જરૂરી પ્રક્રિયા પૂર્ણ કરી આ વર્ષમાં તેનું કામ શરૂ કરવા માટે જરૂરી તૈયારીઓ ચાલુ છે. ખાત્રજ ખાતે ફેડરેશનની જરૂરિયાત પ્રમાણે ચીઝ પ્લાન્ટનું વિસ્તૃતીકરણ કરવાની જરૂરિયાત છે જેના માટે પ્રતિમાસ 1300 થી 1400 મેટ્રિન ટન ચેડાર ચીઝ અને 700 મેટ્રિક ટન પ્રતિમાસ મોઝરેલા ચીઝ બનાવવા માટે પ્લાન્ટનું વિસ્તૃતિકરણ કરવાનું છે. સંઘ દ્વારા ડિસેમ્બર મહિના સુધીમાં ગત વર્ષની સરખામણીમાં 6 ટકાથી વધુ દૂધ સંપાદન કરેલ છે અને કોઈપણ મુશ્કેલી વગર પ્રોસેસ કરી અને અમુલના ઉત્પાદનોનું બજારમાં વેચાણ કર્યું છે.
