- આણંદમાં સતત વધી રહ્યા છે કોરોનાના કેસ
- ખંભાતમાં બે દિવસમાં ફરીથી હોસ્પિટલ શરૂ કરવાની સાસંદે આપી ખાત્રી
- 700થી વધુ શંકાસ્પદ કેસ અને 100 પોઝિટિવ કેસ
આણંદઃ જિલ્લામાં કોરોનાના કેસમાં સતત વધારો થઈ રહ્યો છે ખાસ કરીને ખંભાતમાં કોરોનાના કેસમાં વધારો થઈ રહ્યો છે, ત્યારે સાંસદ મિતેશ પટેલે ખંભાતની વિકટ પરિસ્થિતિ જોઈ તાત્કાલિક કલેકટર સાથે મિટિંગ ગોઠવી ખંભાતમાં બે દિવસમાં ફરીથી હોસ્પિટલ શરૂ કરવાની ખાત્રી આપી હતી. આ અંગે પ્રાપ્ય માહિતી મુજબ જિલ્લામાં ખંભાતમાં તંત્રની બેદરકારીને કારણે કોરોના આંકને છુપાવવામાં આવી રહ્યો છે. જેને લઇ સંક્રમણ વધી રહ્યું છે. ઉપરાંત શહેરમાં એન્ટીજનસી કિટનો અભાવ છે. પૂરતા ટેસ્ટ થતા નથી, તાલુકામાં કોઈ કન્ટેન્ટમેન્ટ ઝોનની સુવિધા નથી. ખાનગી હોસ્પિટલો તગડી ફી વસૂલતા હોવાથી ગરીબ પ્રજા ઘરબેઠા સારવાર લેવા લાચાર બની છે, તાલુકામાં 45 થી વધુ ઉંમરના અનેક શિક્ષકો અધ્યાપકો સંક્રમિત હોય તેઓને ફ્રન્ટલાઈન વોરિયર્સ હોવા છતાં વેકસીનનો લાભ મળતો નથી. જેને લઇ સંક્રમણવધી રહ્યું છે.
કોરોનાથી બે દિવસમાં બે વ્યક્તિના મોત
જિલ્લાના કોરોનાના એપીક સેન્ટર તરીકે જાણીતા ખંભાતમાં કોરોનાએ બીજી ઇનિંગ શરૂ કરી છે. જેમાં કોરોનાથી બે દિવસમાં બે વ્યક્તિના મોત નિપજ્યા છે. મોચીવાડ વિસ્તારમાં રહેતા વિપુલ શાંતિલાલ ચૌહાણનું કોરોનાથી વડોદરા ખાતે સારવાર દરમિયાન મોત નિપજ્યું છે, જ્યારે રેખાબેન નરેશભાઈ પંડ્યાનું કરમસદ મેડિકલ ખાતે સારવાર દરમિયાન મોત નિપજ્યું છે. સપ્તાહમાં કોરોના થી મોતનો આંક 7 પર પહોંચ્યો છે, જ્યારે બીજી તરફ ખંભાત શહેર અકીક હીરા જવેરાતનું હબ ગણાતું હોઇ સુરત, મુંબઈ, જયપુર સાથે ધંધાકીય સંબંધો હોઇ વધુ અવરજવરને કારણે કોરોના બેકાબુ બન્યો છે. જ્યારે એક માસમાં ખંભાતમાંથી અનેક પ્રવાસીઓની બસ ઉપડી હોય તેમાંથી પણ અનેક સંક્રમણનો ભોગ બન્યા છે. જ્યારે અનેક લોકો ચૂંટણી પ્રચાર-પ્રસાર, લોક ડાયરાઓ ભજનોમાં પણ સંકલન ધરાવતા હોઇ તેઓ પણ સંક્રમણનો ભોગ બન્યા હોવાનું બહાર આવ્યું છે.
આ પણ વાંચોઃ સુરતમાં કોરોનાનો કહેર વધતા ડીંડોલીમાં 8,00 મકાનોના 3,500 લોકોને ક્વોરેન્ટાઇન કરાયા
