આણંદઃ પ્રાપ્ત વિગતો અનુસાર ખંભાતના ઘાસગવારા ખાતે આવેલી હીરા વરાણસીની પોળમાં પત્ની સાથે રહેતા નરેન્દ્રભાઈ જીવણલાલ સોની પોતાના ઘરે જ સોનાના દાગીના બનાવીને વેચવાનો તેમજ દાગીના ઉપર ધીરધાર કરવાનો વ્યવસાય કરતા હતા. તેમને ત્યાંથી મહિયારી ગામનો દલજીત ચૌહાણ પણ અવાર-નવાર દાગીના મૂકીને પૈસા લઈ જતો હતો. આઠેક મહિના પહેલાં દલજીત ચૌહાણ, અશોક અને મહાવીરે તેમને ત્યાં આવીને દાગીના મૂકી 2.40 લાખ રૂપિયા લઈ ગયા હતા.
તે દરમ્યાન ગત 28 તારીખના રોજ નરેન્દ્રભાઈની પત્ની પીયર ગઈ હતી અને તેઓ ઘરે એકલા જ હતા, ત્યારે દલજીત, અશોક અને મહાવીર આવી ચઢ્યા હતા અને દાગીના છોડાવવાની વાત કરી હિસાબ કરવાનું કહ્યું હતું. જેથી નરેન્દ્રભાઈ હિસાબ કરીને તિજોરીમાંથી દાગીના લેવા જતાં જ દલજીતે પેન્ટમાંથી ધારધાર છરો કાઢ્યો હતો અને નરેન્દ્રભાઈના ગળા ઉપર મૂકી દીધો હતો. મહાવીરે બન્ને હાથ પકડી રાખ્યા હતા અને દલજીતે થપ્પડો મારીને તિજોરીમાંથી સોનાના બિસ્કીટ, સોનાની લગડીઓ, સોનાના સિક્કા, સોનાના દાગીના, ચાંદીનો એક કિલો ચોરસો તેમજ રોકડા ૫.૫ લાખ મળીને કુલ 24.25 લાખની મત્તા લૂંટી એક થેલામાં મૂકી દીધી હતી.
જો આ વાતની કોઈને જાણ કરીશ કે, પોલીસ ફરિયાદ કરીશ તો તને તારી પત્નીને મારી નાંખીશુ તેવી ધમકી આપી નરેન્દ્રભાઈના હાથ અને પગ પેન્ટ વડે બાંધીને ત્રણેય શખ્સો ત્યાંથી ફરાર થઈ ગયા હતા. બીકના માર્યા આજ દિન સુધી નરેન્દ્રભાઈએ ફરિયાદ કરી નહોતી, પરંતુ તારાપુર પોલીસે દલજીત અને તેની ગેંગને ઝડપી પાડતાં તેઓએ ખંભાત શહેર પોલીસ મથકે આવીને ફરિયાદ કરી હતી.
તારાપુરના કોન્ટ્રાક્ટર-સોનીનું અપહરણ કરીને 10-10 લાખ વસૂલ્યા હતા. જેમાં તારાપુરના વેપારીના અપહરણ કેસની તપાસ ચલાવી રહેલા પીઆઈ ડી. એસ. ગોહિલની તપાસમાં જણાવા મળ્યું હતું કે, મહિયારીના દલજીત ચૌહાણની ગેંગે અગાઉ તારાપુરના એક કોન્ટ્રાક્ટર અને સોનીનું અપહરણ કરીને તેઓને માર મારીને ધાકધમકી આપી 10-10 લાખની ખંડણી વસૂલ કરી હોવાનું ખુલ્યું હતું. પોલીસ દ્વારા આ બન્ને ભોગ બનનારનો સંપર્ક કર્યો હતો, પરંતુ દલજીત અને તેની ટોળીની ધાકધમકીથી એટલા બધા ગભરાઈ ગયા છે કે, પોલીસ ફરિયાદ કરવાનું ટાળી રહ્યા છે. પાંચેયની વિસ્તૃત પૂછપરછમાં બીજી પણ કેટલીક ચોંકાવનારી વિગતો સામે આવે તેમ છે.
