અમરેલી જિલ્લાના રાજુલા ખાતે કરોડો રૂપિયાના ખર્ચે બનતી નિઃશુલ્ક આરોગ્ય હોસ્પિટલના ખાતમુહૂર્ત પ્રસંગમાં ગુજરાતના મુખ્યપ્રધાન વિજય રૂપાણી, નાયબ મુખ્યપ્રધાન નીતિન પટેલ અને પ્રસિદ્ધ રામાયણ કથાકાર મોરારીબાપુના વરદ્ હસ્તે ભૂમિપૂજન ખાતમુહૂર્ત કાર્યક્રમ કરવામાં આવેલ હતો.
રાજુલા ખાતે લોકોના આરોગ્યની જાળવણી માટે નિઃશુલ્ક હોસ્પિટલ કોંગ્રેસ ધારાસભ્ય અંબરીશ ડેરના ટ્રસ્ટ સંચાલિત બની રહી છે. આ હોસ્પિટલના ખાતમુહૂર્ત પ્રસંગમાં ભાજપના ગુજરાતના મુખ્યપ્રધાન સહિત કેબિનેટ પ્રધાન, પ્રદેશ પ્રમુખ જીતુ વાઘાણી પૂનમ માડમ સાથે કોંગ્રેસ નેતા, વિપક્ષ નેતા પરેશ ધાનાણી, અર્જુન મોઢવાડીયા સહિતના ભાજપ કોંગ્રેસના નેતાઓ સૌરાષ્ટ્રના સાધુ સંતો ઉપસ્થિત રહ્યા હતા અને કોંગ્રેસ ધારાસભ્ય અંબરીશ ડેરના નિઃશુલ્ક હોસ્પિટલ નિર્માણને મુખ્યપ્રધાન રૂપાણીએ બિરદાવ્યું હતું.
મુખ્યપ્રધાન રૂપાણી સહિતના કેબિનેટ પ્રધાનો, કોંગ્રેસ ધારાસભ્યના હોસ્પિટલ ખાતમુહૂર્ત પ્રસંગમાં આવવા પ્રકરણે મુખ્યપ્રધાન રૂપાણીએ પક્ષાપક્ષીથી પર રહીને કાર્યક્રમમાં આવ્યા હોવાનું જણાવ્યું હતું પણ કોંગ્રેસના ધારાસભ્ય અંબરીશ ડેર મીડિયા સામે આવ્યા ન હતા. તો કોંગ્રેસના નેતા વિપક્ષ પણ કશું બોલ્યા ન હતા ફક્ત ભાજપના બે નેતાઓ અને મોરારીબાપુએ જ વક્તવ્ય આપ્યા હતા, ત્યારે મોરારીબાપુએ કરોડોના ખર્ચે તૈયાર કરીને લોકો માટે નિઃશુલ્ક સેવાના સારથી અંબરીશ ડેર, માયાભાઈ આહીર સહિત ટ્રસ્ટીઓના બેફાટ વખાણ કર્યા હતા.
