શાહઆલમમાં હિંસાની ઘટના દરમ્યાન ઉમર ખાન પઠાણે ફેસબુક પર વિવાદાસ્પદ વીડિયો શેયર કર્યો હતો. આ વીડિયો લખનઉનો હોવા છતાં તેને શાહઆલમનો બતાવી ટોળાને ઉશકેરવાનો આક્ષેપ કરવામાં આવ્યો છે. ક્રાઈમ બ્રાંચે ખોટો વીડિયો અપ્લોડ કરી લોકોને ભ્રમિત કરી ઉશકેરવાનો આક્ષેપ પઠાણ પર કર્યો હતો. વિવાદાસ્પદ વીડિયોમાં પોલીસ વ્યકિતના ઘરમાં ઘુસીને દમન કરતી હોય તેમ દેખાઈ રહ્યું છે.
આ સિવાય શાહઆલમમાં થયેલી હિંસાના ટોળામાં સામેલ 13 લોકોની જામીન અરજી મેટ્રો કોર્ટે ફગાવી દીધી હતી. મેટ્રો કોર્ટે મહત્વનું અવલોકન કરતા જણાવ્યું હતું કે આરોપીઓ પર આઈપીસીની કલમ 307 લગાડવામાં આવી છે જેના જામીન આપવાની સતા મેટ્રો કોર્ટ પાસે ન હોવાથી શેસન્સમાં જામીન અરજી દાખલ કરવી પડશે.
આ સમગ્ર કેસની વિગત એવી છે કે NRC અને CAAના વિરોધમાં સ્થાનિક કોગ્રેસી કોર્પોરેટર શહેઝાદ ખાન દ્વારા રેલી કાઢવામાં આવી હતી, પરતું પોલીસે પરવાનગી ન આપતા છતાં રેલી કાઢવાનો પ્રયાસ કરાતા પોલીસે સ્થાનિક આગેવાનોની ધરપકડ કરતા ટોળો ઉશકેરાયો હતો અને હિંસા ફાટી નીકળી હતી.
