Junior Clerk Paper Leak Case: પેપર લીક મામલે પરીક્ષાર્થીઓમાં આક્રોશ, ATS એ 15 શકમંદોની કરી ધરપકડ

જુનિયર કલાર્કનું પેપર લીક થતા પરીક્ષા રદ કરવામાં આવતા પરીક્ષાર્થીઓ વ્યથિત થઇ ગયા છે. જોકે, પેપર કંઇ રીતે અને ક્યાંથી ફુટ્યું તેને લઇને ગુજરાત ATS મેદાનમાં આવી ગઇ છે. શકમંદ લોકો અમૂક પરીક્ષાર્થીઓને લઇ વડોદરા ગયા હતા. વડોદરામાંથી 15 લોકોને પકડવામાં આવ્યા હતા. આ તમામ લોકો અલગ-અલગ રાજ્યમાં કામ કરતા હતા.

અમદાવાદ: જુનિયર ક્લાર્કની આજે યોજાનારી પરીક્ષા પહેલા જ પેપર લીક થતા પરીક્ષાને રદ કરવામાં આવતા જ તમામ પરીક્ષાઓમાં ભારે રોષ જોવા મળી રહ્યો છે. રાજ્યભરના લાખો વિદ્યાર્થીઓ છેલ્લા ઘણા સમયથી આ પરીક્ષા માટે તૈયારી કરી રહ્યા હતા. એક દિવસ પહેલા જ પેપર લીક થઈ જતા પરીક્ષાને રદ કરવાની જરૂર પડી હતી તેવામાં અલગ અલગ તાલુકાઓ અને જિલ્લાઓમાંથી અમદાવાદ ગાંધીનગર સહિતના શહેરોમાં પરીક્ષા આપવા માટે આવેલા પરીક્ષાર્થીઓમાં નારાજગી જોવા મળી હતી.

માહિતીના આધારે 15 શખ્સોની ધરપકડ: ખાસ કરીને આ સમગ્ર બાબતને લઈને ગુજરાત એટીએસની ટીમ પહેલાથી જ પરીક્ષાના પેપર લીક ન થાય તે માટે કામ કરી રહી હતી. તેવામાં પરીક્ષાના એક દિવસ પહેલા એટલે કે શનિવારે વડોદરા શહેરમાંથી એટીએસએ ચોક્કસ માહિતીના આધારે 15 શખ્સોની ધરપકડ કરી હતી. જે 15 શખ્સો દ્વારા આ સમગ્ર પેપર લીક કરવામાં આવ્યું હોવાનો ખુલાસો થયો છે. પકડાયેલા 15 આરોપીઓ અલગ અલગ રાજ્યોના હોવાનું પણ સામે આવતા ગુજરાત એટીએસની ટીમ ઓડિશા તેમજ અન્ય રાજ્યોમાં તપાસ માટે રવાના થઈ છે.

પેપર લીક કૌભાંડનું એપી સેન્ટર વડોદરા શહેર: મહત્વનું છે કે આ વખતે પેપર લીક કૌભાંડમાં એપી સેન્ટર વડોદરા શહેર બન્યું છે. વડોદરા શહેરમાં આવેલી એક કોચિંગ ક્લાસ આ મામલે સીલ કરવામાં આવી છે. સ્ટેકવાઇસ ટેકનોલોજી નામની ક્લાસીસમાં પેપર વિદ્યાર્થીઓને વહેંચવામાં આવ્યું હોવાનો ખુલાસો થયો છે. કોચિંગ સેન્ટર પરથી અનેક જૂના પ્રશ્નપત્રો પણ એટીએસને મળી આવ્યા હતા. આ મામલે ટીમ સંચાલક સહિતના આરોપીઓની ધરપકડ કરવામાં આવી છે. વડોદરા સુરત અને અન્ય જિલ્લાઓમાંથી પણ કુલ 25 જેટલા આરોપીઓની આ સમગ્ર મામલે પૂછપરછ હાથ ધરાઇ છે.

આ પણ વાંચો Junior Clerk Paper Leak: રાત્રીના 2 કલાકે પેપર ફૂટ્યું, પોલીસને જાણ કરીને 6.20 કલાકે પરીક્ષા મોકૂફ કરી

શકમંદો પર રાખવામાં આવી રહી હતી નજર: જુનિયર ક્લાર્કનું પેપર લીક થવા મામલે ગુજરાત ATSના એસપી સુનિલ જોશીએ પ્રતિક્રિયા આપી છે. તેમણે જણાવ્યું કે, ગુજરાત ATSએ છેલ્લા 2-3 દિવસથી શકમંદ લોકો પર નજર રાખી હતી. શકમંદ લોકો અમૂક પરીક્ષાર્થીઓને લઇ વડોદરા ગયા હતા. વડોદરામાંથી 15 લોકોને પકડવામાં આવ્યા હતા. આ તમામ લોકો અલગ-અલગ રાજ્યમાં કામ કરતા હતા.

આ પણ વાંચો Junior Clerk Exam Paper Leaked: પેપર રદ્દ થતા ઉમેદવારોનો આક્રોશ સાતમા આસમાને

પેપર કંઇ રીતે અને ક્યાંથી ફુટ્યું તેને લઇને ગુજરાત ATS મેદાનમાં

ATSની ટીમો તપાસ માટે રવાના: ગુજરાત પંચાયત સેવા પસંદગી મંડળનું જુનિયર ક્લાર્કનું પેપર ગુજરાત બહારથી લીક થયું હોવાથી પ્રાથમિક માહિતી બહાર આવી છે. તેલંગણાની પ્રિન્ટીંગ પ્રેસમાં પેપર લીક થયું હોવાનું કહેવામાં આવી રહ્યું છે. પેપર લીક કાંડમાં તેલંગાણા, બિહાર, ઓડિશા સહિતના રાજ્યોના લોકો સંડોવાયેલા હોવાનું સામે આવ્યું છે. જેના કારણે ગુજરાત એટીએસની 5 ટીમો આ રાજ્યોમાં તપાસ કરવા માટે પહોંચી ગઈ છે.