અમદાવાદઃ પ્રજ્ઞેશ પટેલે મેડિકલ ગ્રાઉન્ડ ઉપર 30 દિવસની વચગાળાની જામીન અરજી દાખલ કરી હતી. જો કે, કોર્ટે સિવિલ હોસ્પિટલ સ્થિત કેન્સર હોસ્પિટલમાં પ્રજ્ઞેશની સારવાર કરાવવા અને તે અંગેનો રિપોર્ટ 10 દિવસમા રજૂ કરવા આદેશ આપ્યો છે. જેથી હવે કેન્સર હોસ્પિટલમાં પ્રજ્ઞેશની સારવાર શરૂ કરવામાં આવશે.
પ્રજ્ઞેશ પટેલની જામીન અરજી આજે કોર્ટે નામંજૂર કરી છે. પ્રજ્ઞેશન મોઢાના કેન્સરની સારવાર માટે મુંબઈ ટાટા મેમોરિયલ હોસ્પિટલમાં ટ્રીટમેન્ટ માટે ટેમ્પરરી બેઇલ માટેની અરજી કરી હતી. કોર્ટ ઓબ્ઝર્વેશન પ્રમાણે એવી સૂચના આપેલી છે કે જેલ ઓથોરિટી તરફથી ગુજરાત રિસર્ચ કેન્સર અસારવા સિવિલ હોસ્પિટલ ખાતે સારવાર કરાવવામાં આવશે અને આ રિપોર્ટ સમક્ષ રજૂ કરવાનો રહેશે. - સરકારી એડવોકેટ પ્રવીણ ત્રિવેદી
કેન્સરની બિમારીની સારવાર માટે અરજી કરી હતી : ઇસ્કોન અકસ્માત કેસમાં જેલવાસ ભાગવી રહેલા પ્રજ્ઞેશ પટેલે સારવાર માટે એક મહિનાના જામીન માગતી અરજી કરી હતી. જેમાં એવી રજૂઆત કરવામાં આવી હતી કે, ઘણા સમયથી કેન્સરની બિમારીથી પિડાય છે, મુંબઇની હોસ્પિટલમાં અગાઉ સારવાર કરાવી હતી તે અંગેના દસ્તાવેજ પણ છે, ગંભીર પ્રકારની બિમારી છે જો યોગ્ય ઇલાજ ન કરવામાં આવે તો કેન્સર ફેલાય તેવી શક્યતા છે, ત્યારે એક મહિનો સારવાર માટે જામીન આપવા જોઇએ.
આરોપી બચવા માટે ખોટા બહાના આપી રહ્યો છે : આ અરજીનો વિરોધ કરતા મુખ્ય સરકારી વકીલ પ્રવિણ ત્રિવેદીએ જણાવ્યું હતું કે, આરોપીએ છેલ્લે 2019માં સારવાર કરાવી હતી ત્યાર બાદ તેણે એક પણ વાર સારવાર કરાવી નથી, આમ હવે સારવારની કોઇ જરૂર હોય તેમ જણાતું નથી, આરોપી જેલમાંથી નિકળવા માટે ખોટી રીતે અરજી કરી રહ્યો છે.
આરોપી અગાઉ પણ અનેક ગુનામાં સંડોવાયેલ છે : આરોપી પ્રજ્ઞેશ પટેલ સામે 10 ગુના હોવાથી તે ગુનો કરવા માટે ટેવાયેલ છે, આરોપી તથ્યને ઘટના સ્થળેથી ભગાડી ગયો હતો. જેથી તેને વચગાળાના જામીન આપવામાં આવે તો તે પુરાવા સાથે ચેડા કરે તેવી શક્યતા છે, તેથી તેને જામીન પર મુક્ત ન કરવો જોઇએ. આવી રજૂઆત બાદ કોર્ટે પ્રજ્ઞેશની વચગાળાની જામીન અરજી ફગાવી દીધી છે. પરંતુ તેની સારવાર કેન્સર હોસ્પિટલમાં કરાવવા જેલ ઓથોરીટીને નિર્દેશ આપ્યો છે.
