- સ્થાનિક સ્વરાજ ચૂંટણીના જંગમાં બળવાખોરી
- ભાજપ અને કોંગ્રેસ બન્નેને આંખે પાણી લાવે તેવી ઘટનાઓ બની
- પરિણામોમાં કંઇક નવાજૂની થવાના એંધાણ
અમદાવાદ : ચૂંટણી આવે ત્યારે ટિકિટનું કમઠાણ સામાન્ય વાત છે, પણ તે ચૂંટણીના પરિણામ સુધી અસર કરે છે, જેથી તેને વધુ ગંભીર મુદ્દો ગણાય છે. ગુજરાતમાં સ્થાનિક સ્વરાજની ચૂંટણી છે. 6 મહાનગરપાલિકામાં ભાજપમાં એવરેજ દરેક વૉર્ડ દીઠ 45 લોકો ટિકિટ માટે દાવેદારી કરી હતી, જ્યારે કોંગ્રેસમાં તો રીતસર હોબાળો જ થયો હતો. ટિકિટનો મેન્ડેટ નહીં મળતાં કોગ્રેસ ભવન પર દેખાવો અને બળવો થઈ ગયો. આ પણ પાછો જેવો તેવો નહીં, રીતસરના પ્રદેશ નેતાગીરીએ પલાયન કરી જવું પડ્યું એવી માત્રામાં આ બધું થયું. હજુ પણ કોંગ્રેસ નેતાગીરી જુદાં જુદાં ફાર્મ હાઉસોમાં પોતાના પક્ષના જ કાર્યકરોની નજર બચાવીને બેઠકો કરી રહી છે. NSUIના કાર્યકર્તાઓએ તો ફાર્મ હાઉસ પર પહોંચીને પણ હંગામો મચાવ્યો હતો, જેને લઇને નેતાએને અહીં તહીં ભાગતાં ફરવાનો વારો આવી ગયો છે.
ઇમરાન ખેડાવાલાએ નેતાઓનું નાક દબાવ્યું
કોંગ્રેસમાં ટિકિટના કમઠાણે તો એવી ભારે કરી કે MLA બનીને ગુજરાત વિધાનસભામાં બિરાજમાન થયેલાં ઇમરાન ખેડાવાલાએ રાજીનામું સુદ્ધા આપી દીધું હતું! બહેરામપુરા વૉર્ડમાં કોંગ્રેસની નેતાગીરીએ કદાચ કંઇક વિચારીને 6 ઉમેદવારને મેન્ડેટ પકડાવ્યાં હતાં, પણ ઇમરાન ખેડાવાલા પોતાના ઉમેદવારોને લઇને એવા રોષે ભરાયાં કે નેતાગીરી સામે રીતસર ખુલ્લંખુલ્લા આવી ગયાં હતા. ગાંધીનગરથી દૂર પ્રાંતીયા ગામના એક ફાર્મ હાઉસમાંથી જ તેમને રાજીનામું પ્રદેશ પ્રમુખ અમિત ચાવડાને પાઠવી પણ દીધું. જોકે, તેમનું આ પગલું ખરેખર રાજીનામું આપવાના ધ્યેય સાથે તો હતું નહીં એટલે તેમને નિયમાનુસાર વિધાનસભા સ્પીકર રાજેન્દ્ર ત્રિવેદીને રાજીનામું ન હતું આપ્યું. અલબત્ત દિલ્હીથી દોડાવાયેલાં તામ્રધ્વજ સાહુએ મામલો શાંતિથી સાંભળ્યો અને ખેડાવાલાને મનાવી લીધાં તો છેવટે તેમને રાજીનામું પરત લઇ લીધું છે.
કોંગ્રેસના ઉમેદવારે ફોર્મ પરત લેતાં ભાજપને પહેલો વિજેતા મળ્યો
અમદાવાદ મહાનગરપાલિકામાં ત્રણ ટર્મથી ભાજપે સત્તા સંભાળી છે. ત્યારે અમુક વૉર્ડમાં સ્થિતિ એવી છે કે, કોંગ્રેસ તરફથી ચૂંટણી લડવા માટે ઝૂકાવવા ઉમેદવાર જ રસ બતાવતાં નથી. નારણપુરા વૉર્ડ એવો જ એક વૉર્ડ છે, જ્યાં કોંગ્રેસનો ગજ વાગે એવો નથી. અહીં કોંગ્રેસના ચંદ્રિકા રાવલે મંગળવારે ફોર્મ પરત ખેંચી લીધું હતું. આ સાથે જ ભાજપના બ્રિન્દા સુરતી અમદાવાદ મહાનગરપાલિકા ચૂંટણીના મતદાન અને પરિણામ પહેલાં જ જીતી ગયેલાં ઉમેદવાર બની ગયાં છે. તેમને બિનહરીફ વિજેતા જાહેર કરી દેવાયાં છે. મહિલા કોંગ્રેસના ઉપપ્રમુખ સોનલ પટેલે તો એવો આક્ષેપ પણ કર્યો કે, નેતાગીરીએ રૂપિયા 20 લાખમાં ઇન્ડિયા કોલોની વૉર્ડની ટિકિટનો સોદો કર્યો છે. સોનલ પટેલનો બળવો એટલા માટે લોકોનું ધ્યાન ખેંચી રહ્યો છે કે, તેમને આ ઉપરાંત પ્રદેશ નેતાઓની છાપ વિશે ગંભીર આક્ષેપો પણ કર્યાં છે. જેને લઇને સોનલ પટેલની કોંગ્રેસ પક્ષમાંથી હકાલપટ્ટી કરી દેવામાં આવી છે.
ખુદ દીપક બાબરીયાએ પણ નોંધ લેવી પડી
તો ચૂંટણી નિરીક્ષક નીમાયેલાં દીપક બાબરીયાએ પણ જે નિવેદન કરતો પત્ર લખ્યો તે પણ ચૂંટણીના માહોલમાં પ્રદેશ નેતાગીરી સામેના બળવારુપે જોઇ શકાય છે. તેમને પ્રદેશ નેતાઓ, ધારાસભ્યોના દબાણને લીધે રાતોરાત તેમને નક્કી કરેલી ઉમેદવારોની પેનલો બદલાઈ ગઈ હોવાનો અફસોસ વ્યકત કરતાં જણાવ્યું છે કે, તેમને આ બાબતે દિલ્હી હાઈકમાન્ડને જાણ કરશે.
ભાજપ પ્રમુખે પહેલાંથી બળવાખોરી ડામવા કર્યો હતો પ્લાન
કોંગ્રેસ કરતાં વધુ શિસ્તબદ્ધ પક્ષ હોવાની છાપ ધરાવતા ભાજપમાં પણ અસંતોષની ચિનગારીઓ તો ઉડી જ છે અને ક્યાંકને ક્યાંક ભડકો પણ થયો છે. જોકે, ટિકટવાંચ્છુઓના અસંતોષના મામલા સામે આવશે જ તેવી પૂર્વધારણા સાથે પ્રદેશ પ્રમુખ સી. આર. પાટીલે પાણી પહેલાં પાળ બાંધી દીધી હતી. તેમને બાકાયદા ચૂંટણીમાં લડવા ઇચ્છતાં ઉમેદવારો માટે પક્ષે નિયમો બનાવ્યાં છે, તેવી જાણ કરી દીધી હતી. બાજુમાં એક અલગ તખ્તો પણ રચાયો હતો કે, પક્ષનો શિસ્તબદ્ધ કાર્યકર કેવો હોય, સોનલ મોદી જેવો હોય. વડાપ્રધાન નરેન્દ્ર મોદીના ભત્રીજી હોવા છતાં પક્ષે તેમને સગાંવાદ ન ચલાવતાં ટિકિટ આપી નથી, તેવું અન્ય બધાં ઉમેદવારોને સાનમાં સમજાવી દેવા માટે ઉદાહરણ પ્રસ્તુત કરી દીધું. પક્ષે બનાવેલા નિયમ સૌએ પાળવાનો છે, તેવો સંદેશ આ ઉદાહરણ દ્વારા એવો સજ્જડપણે ગયો કે જે લોકો મોં ખોલવાની તૈયારીઓમાં હતાં તેમને માંડી વાળવું પડ્યું હતું. ઉમેદવારી માટે નિયમો બનાવ્યાં છે, તેને અનુસરવા પાટીલે કાર્યકરોને અપીલ કરી છે, પરંતુ મૌનમાં સમેટાઈ ગયેલો અસંતોષ અવ્યક્ત રહ્યો છે, બૂઝાયો નથી. બગાવત કરનારા કેટલાય કાર્યકરો ચૂંટણીમાં નિષ્ક્રિય બનશે એ નક્કી છે.
ભાજપમાં અસંતોષનો અગ્નિ ધરબાયો છે, બૂઝાયો નથી
ભાજપ પ્રદેશ પ્રમુખ સી. આર. પાટીલે પાર્લામેન્ટરી બોર્ડની બેઠકમાં ટિકિટ માટે નવો નિયમ બનાવ્યો, કે 60 વર્ષથી ઉપરનાંને ટિકિટ નહીં અને ત્રણ ટર્મથી કોર્પોરેટર હોય તેમને ટિકિટ નહીં. તેમ જ પરિવારવાદમાં પુત્ર, પુત્રી કે ભાઈ ભત્રીજાને પણ ટિકિટ નહીં. આ નિયમો જાહેર થયા બાદ ભારે અંસતોષ જોવા મળ્યો અને તેમાં કેટલાય લોકોના પત્તા કપાઈ ગયાં હતા. આ તમામ ભાજપથી નારાજ થયાં અને બીજા પક્ષમાં જવા માટેના ચક્રો ગતિમાન કર્યા છે. ભાજપમાં અસંતોષ જરૂર થયો, પણ બહુ ખૂલીને બહાર નથી આવ્યો. કારણ કે, પાર્ટીના નિયમોની અવગણના તેમની કરિયરને નુકસાન કરી શકે છે. આ સંજોગોમાં નવા ઉમેદવારોને ટિકિટ મળી તેમની સાથે ચૂંટણી પ્રચારમાં સીનિયર કોર્પોરેટર્સ જતાં નથી, તેવી ફરિયાદ ઉઠી છે. ભાજપે તો એકસામટી યાદી જાહેર કરી દીધી છે, પણ કોંગ્રેસમાં તો વિરોધ જ એટલો બધો થયો કે સત્તાવાર રીતે યાદી જાહેર થઈ શકી નહી. ઉમેદવારોને ફોન કરીને અને કેટલાકને મેઈલ કરીને મેન્ડેટ આપી દેવાયો છે. કોંગ્રેસ ભવન આગળ તમામ વિસ્તારના કાર્યકરો પોતાના સમર્થકો સાથે ઉમટી પડ્યાં હતાં. જોકે એ વાત જુદી છે તે તેમના નેતાઓ ફાર્મ હાઉસોમાં ભરાઈ ગયાં હતાં.
સ્થાનિક ચૂંટણીમાં ટિકિટ માટે કેમ પડાપડી થાય છે?
ભાજપ અને કોંગ્રેસમાં ચૂંટણી સમયે ટિકિટની દાવેદારી નોંધાવી અને બાદમાં ટિકિટ ન મળે ત્યારે બગાવત થાય છે. રાજકીય પક્ષ આવા નારાજ કાર્યકરોને મનાવી લેતી હોય છે, પણ નારાજ કાર્યકરો વિલનની ભૂમિકા ભજવતા હોય છે. ભાજપ હોય કે કોંગ્રેસ બન્ને પક્ષમાં આ વખતે નારાજગીનો સૂર વધુ જોવા મળ્યો છે. દરેક કાર્યકરને મલાઈદાર કોર્પોરેટર પદ હાંસલ કરવાની ઈચ્છા હોય છે અને ત્યાંથી તે સક્રિય રીતે રાજકારણમાં પ્રવેશ કરે છે. સૌ કાર્યકરને ઈચ્છા હોય છે કે કોર્પોરટર બને અને પછી ધારાસભ્ય બને અને પછી સાંસદ બને.... એટલે ટિકિટની માંગણી થતી હોય છે.
ટિકિટ મળે કે ન મળે, પરંતુ પક્ષમાં તમામ સરખા : ભંડેરી
આ અંગે રાજ્યના મ્યુનિસિપલ ફાઇનાન્સ બોર્ડ ચેરમેન અને ભાજપના દિગ્ગજ નેતા ધનસુખ ભંડેરીએ ETV BHARATને જણાવ્યું હતું કે, પક્ષની કામગીરીને લઇને ત્યાં કાર્યકર્તાઓમાં અસંતોષ હોય પરંતુ જે લોકોને ટિકિટ આપવામાં આવી છે. તેની સાથે ખભેખભા મિલાવીને ભાજપના કાર્યકર્તાઓ તેમની જીત માટે કામ કરતા હોય છે. જ્યારે હોઈ શકે છે. કેટલાક નેતાઓ કાર્યકર્તાઓને માઠું0 લાગ્યું હોય, પરંતુ ભાજપમાં પક્ષ સર્વસ્વ છે અને પક્ષના નિર્ણયને જ તમામ નેતાઓ કાર્યકર્તાઓ વળગી રહેતા હોય છે.
જે સક્ષમ નથી તે લોકો કોંગ્રેસ છોડીને જાય છે : ઇન્દ્રનીલ
રાજકોટના પૂર્વ ધારાસભ્ય ઇન્દ્રનીલ રાજ્યગુરુએ ETV BHARATને જણાવ્યું હતું કે, જે કોંગ્રેસના નેતાઓ કદાચ પક્ષ છોડીને જતા હોય છે, જ્યારે કાર્યકર્તાઓ કોઈ દિવસ પક્ષ છોડીને જતા નથી. અમારા કાર્યકર્તાઓ ભાજપના કાર્યકર્તાઓ કરતા વધુ મજબૂત અને સક્ષમ હોય છે. જ્યારે ભાજપ દ્વારા પોતાનાજ પક્ષના નેતાઓ અને કાર્યકર્તાઓ જો પક્ષથી નારાજ હોય તો પણ તેને દબાવી રાખતા હોય છે, જ્યારે કોંગ્રેસમાં એવું નથી કોંગ્રેસ પક્ષની વિચારધારા સાથે કાર્યકર્તાઓ દિલથી જોડાઈને રહેતા હોય છે.
આ અંગે જાણીતા વરિષ્ઠ પત્રકાર અજય દવેએ ETV BHARATને જણાવ્યું હતું કે, ભાજપ સૌથી મોટી પાર્ટી હોવાથી જો કોઈ કાર્યકર બળવો કરે, તો ભાજપને કોઈપણ પ્રકારની પરવા હોતી નથી. કારણ કે, 70 ટકા જનાધાર ભાજપ પાસે જ છે અને જો એ બળવો કરીને અપક્ષમાંથી જીતી જાય તો ફરી એ ભાજપમાં પાછો આવી જાય છે. કોંગ્રેસ કસીન છે, કોઇ જગ્યા એ દેખાતું નથી અને વિપક્ષ વેરવિખેર થઈ ગયો છે.
અમદાવાદથી પારુલ રાવલનો અહેવાલ (સહયોગ-ભાવેશ સોંદરવા, રાજકોટ અને રોનક શાહ, વડોદરા)
