અમદાવાદ : આણંદ જિલ્લામાં અલગ સિવિલ હોસ્પિટલ બનાવવાની માંગણી સાથે ગુજરાત હાઇકોર્ટ સમક્ષ જાહેર હિતની અરજી કરવામાં આવી છે. તેમાં ગઈકાલે સુનાવણી હાથ ધરાઈ હતી. સિવિલ હોસ્પિટલના કામમાં જે વિલંબ થઈ રહ્યો છે તે અંગે હાઇકોર્ટે સરકારને પ્રશ્ન પૂછ્યા હતા અને સ્પષ્ટ રીતે કહ્યું હતું કે, કેટલા સમયમાં હોસ્પિટલનું કામ પૂર્ણ થશે? આટલો બધો સમય થયો હોવા છતાં પણ હજુ સુધી કેમ કામ થયું નથી ? આ સાથે જ હાઇકોર્ટ લોકોના સ્વાસ્થ્ય અંગે ચિંતા પણ વ્યક્ત કરી હતી.
શું છે સમગ્ર મામલો? : રાજ્યમાં આણંદ જિલ્લો નવો બનાવવામાં આવતા તેને 25 વર્ષથી વધુનો સમય થઈ ગયો હોવા છતાં પણ આણંદ જિલ્લાને હજુ સુધી પ્રાથમિક સારવાર અને સિવિલ હોસ્પિટલ નહીં મળતા લોકોને અને હાલાકીનો સામનો કરવો પડતો હતો. જેથી હાઇકોર્ટમાં જાહેર હિતની અરજી કરવામાં આવી હતી. પરંતુ આટલા વર્ષો થઈ ગયા હોવા છતાં પણ હજુ સુધી આણંદ જિલ્લાને સિવિલ હોસ્પિટલ ફાળવવામાં આવી નથી.
હોસ્પિટલ સ્થાપવાની જાહેરાત : આ અરજીના અરજદારની રજૂઆત હતી કે, 2016માં ખુદ આણંદ જિલ્લાના કલેકટરે આણંદમાં અલગ સિવિલ હોસ્પિટલ સ્થાપવાની જાહેરાત કરવામાં આવી હતી. આ હેતુ માટે થઈને જમીનની ફાળવણી પણ કરી દેવામાં આવી. પરંતુ તેમ છતાં હજુ સુધી આ મામલે આગળની કોઈપણ કાર્યવાહી થઈ જ નથી. રાજ્યમાં મોટાભાગના તમામ જિલ્લાઓને પોતાની અલગ સિવિલ હોસ્પિટલ છે, ત્યારે આણંદ જિલ્લાને પણ અલગ સિવિલ હોસ્પિટલ મળવી જોઈએ.
આ પણ વાંચો : Gujarat High Court : શૈક્ષણિક સંસ્થાઓમાં થતા રેગિંગ મુદ્દે હાઈકોર્ટે સરકારને કર્યા આકરા સવાલ
રાજ્ય સરકારે હાઇકોર્ટને જવાબ આપ્યો : આ સમગ્ર મામલે સુનાવણી દરમિયાન રાજ્ય સરકારે હાઇકોર્ટમાં પોતાનો જવાબ રજૂ કર્યો હતો કે, સિવિલ હોસ્પિટલ માટે જે જગ્યાની ફાળવણી કરવામાં આવી છે તે જગ્યાની ફાળવણીમાં સ્થાનિકોના વિરોધ અને અન્ય આંતરિક મુદ્દાઓના કારણે પ્રોજેક્ટ સમયસર શરૂ થઈ શક્યો નથી. આ સાથે જ સરકારે કોર્ટને ખાતરી આપી હતી કે, આણંદ જિલ્લાના કલેક્ટર સિવિલ હોસ્પિટલ માટેની જગ્યાની ફાળવણી અને તે માટેનો હુકમ પણ ઝડપથી કરશે.
આ પણ વાંચો : Gujarat High Court News : ચીફ જસ્ટિસ અરવિંદ કુમાર બનશે સુપ્રીમ કોર્ટના જજ, કોલેજિયમે કરી હતી ભલામણ
કોર્ટે એક્શન પ્લાન માગ્યો : આ સમગ્ર મામલે સુનાવણી સાંભળ્યા બાદ હાઇકોર્ટે લોકોના સ્વાસ્થ્ય મામલે ચિંતા વ્યક્ત કરતા કહ્યું હતું કે, આણંદ જિલ્લામાં સિવિલ હોસ્પિટલના અભાવે નાગરિકોને આરોગ્યલક્ષી હાલાકી ના પડવી જોઈએ. આ ઉપરાંત હાઇકોર્ટ હુકમ કર્યો છે કે, 27 ફેબ્રુઆરી સુધીમાં રાજ્ય સરકારે સિવિલ હોસ્પિટલ અંગેનો પ્રોજેક્ટ અને એક્શન પ્લાન કોર્ટ સમક્ષ રજુ કરવાનો રહેશે. આ સાથે જ હાઈકોર્ટે રાજ્ય સરકાર, આણંદ જિલ્લા કલેકટર આણંદ ડીડીઓ, સહિતના સંબંધિત પક્ષકારોને નોટિસ પાઠવી છે. આ સમગ્ર મામલે આગામી 24 ફેબ્રુઆરીના રોજ વિગતવાર સુનાવણી હાથ ધરવામાં આવશે.
