'સપ્તપદી'ના વચન નિભાવતી પત્ની, મુશ્કેલીના સમયે પતિના પડખે અડગ ઉભી રહી

અમદાવાદ: ગોતા નજીક જગતપુરમાં ગણેશ જીનેસીસ ફ્લેટમાં લાગેલી આગમાં અનેક લોકો ફસાયા હતા. જેમને ફાયર વિભાગે રેસ્ક્યુ કરીને બહાર કાઢ્યા હતા. પરંતુ 9મા માળે દર્શન નામના યુવકનું શરીર ભારે અને પગમાં ઓપરેશન કરાવ્યું હોવાથી બહાર આવવું મુશ્કેલ હતું. આ સમયે પણ તેમની પત્ની તેમની સાથે જ હતી અને પતિ-પત્ની સલામત જગ્યાએ જતા રહ્યા હતા. આગ બંધ થતા ફાયર વિભાગ દ્વારા તેમને નીચે લાવવામાં આવ્યા હતા.

પ્રાપ્ત વિગતો મુજબ ગોતા-ગાંધીનગર રોડ પર ગોદરેજ ગાર્ડન પાસેની એક બિલ્ડિંગમાં આગ લાગી હતી. આ આગ બિલ્ડિંગના 5મા માળે લાગી હતી. આ આગમાં 1નું મોત થયું છે, જ્યારે 9થી વધુ લોકોનો આબાદ બચાવ થયો છે. આ આગ બુઝાવવા ઘટનાસ્થળે ફાયરની 5 ગાડીઓ પહોંચી હતી.

ગોતા-ગાંધીનગર રોડ પર ગોદરેજ ગાર્ડનની એક બિલ્ડિંગમાં આગ લાગી હતી. આ આગમાં બિલ્ડિંગમાં ફસાયેલા લોકોને બહાર કાઢી લેવામાં આવ્યાં છે. આગમાં ગંભીર રીતે ઘાયલ થયેલા લોકોને હોસ્પિટલમાં ખસેડવામાં આવ્યાં છે. આ સિવાય બીજા 10 જેટલા લોકોને પણ બચાવી લેવામાં આવ્યા છે.

ભયંકર આગ પાંચમાં માળેથી 9માં માળ સુધી ફેલાઈ હતી. જેમાં અનેક લોકો પણ ફસાયા હતા. પરંતુ ફાયર વિભાગે તમામ લોકોને રેસ્ક્યુ કરીને બહાર કાઢ્યા હતા. જયારે નવમા માળે ફ્લેટમાં રહેતા દર્શન નામના યુવકને પગમાં ફેકચર થતાં ઓપરેશન કરાવ્યું હતું. જેને કારણે નીચે આવવું શક્ય નહોતું પરંતુ દર્શનની સાથે તેમની પત્ની અને માતા-પિતા પણ રહેતા હતા.

માતા-પિતા તો નીચે આવી ગયા હતા, પરંતુ દર્શનની પત્ની તેમની સાથે જ રહી હતી અને સાથ છોડ્યો ન હતો. દર્શનના જણાવ્યા મુજબ, સુરતમાં બનેલી આગની ઘટના બાદ તેમને આગની પરિસ્થિતિમાં કઈ રીતે બચવું તે અંગે વીડિયો જોયા હતા માટે પતિ-પત્ની બંને ભીનો ટુવાલ લઈને દરવાજો બંધ કરી ખુલ્લી હવા આવે તેવી વિન્ડો પાસે જતા રહ્યા હતા. આગ બંધ થતાં ફાયર વિભાગ દ્વારા દર્શનને વ્હીલચેર સાથે જ નીચે લાવવામાં આવ્યા હતા.