અમદાવાદઃ એકતરફ છેલ્લા કેટલાક દિવસથી કોરોના વાયરસના કેસના આંકડા જોતા સતત વધારો થઈ રહ્યો છે. જેમાં 24 કલાકમાં 256 દર્દીઓ જુદી જુદી હોસ્પિટલોમાં દાખલ થયા છે. જ્યારે સારવાર દરમ્યાન વધુ 19 દર્દીના મૃત્યુ થયા છે. આ સાથે કુલ મૃત્યુનો આંકડો 764 પર પહોંચ્યો છે.
ધન્વંતરી રથમાં ડોક્ટર, પેરામેડિકલ સ્ટાફ, ફાર્માસિસ્ટ દવાઓથી ભરેલી 84 એમ્બ્યુલન્સ શહેરના 332 જેટલા વિસ્તારોમાં ફરીને લોકોને ચેક કરી દવા આપી રહી છે. 40 વર્ષથી ઉપરની તમામ વ્યક્તિઓના ડાયાબિટીસ ફરજિયાત ચેક કરીને સારવાર આપીને કેસને પોઝિટિવ થતો અટકાવવામાં મહત્વનો ભાગ ભજવે છે. મ્યુનિસિપલ કોર્પોરેશનની યાદી મુજબ 17 મે ના રોજ સરેરાશ દર્દીઓની સામે 10 ટકા કેસ તાવના, 32 ટકા શરદી- કફ અને 6 ટકા કેસ સીવીયર રેસ્પીરેટરી ટ્રેક ઇન્ફેક્શનના આવતા હતા. ધન્વંતરી રથ મારફતે લોકોને દવાઓ અને સારવાર આપવામાં આવતા તાવમાં 2 ટકાનો ઘટાડો, શરદી- કફના કેસમાં 16 ટકાનો અને સીવીયર રેસ્પીરેટરી ટ્રેક ઇન્ફેક્શનના કેસમાં ખૂબ જ મોટો ઘટાડો આવતા પ્રમાણ નહિવત થઈ ગયું છે.
