અમદાવાદ : અમદાવાદ મ્યુનિસિપલ કોર્પોરેશન વર્ષ 2023-24નું બજેટ રજૂ થાય તે પહેલા આજે જનરલ બોર્ડનું આયોજન કરવામાં આવ્યું હતું. જેની અંદર અમદાવાદ શહેરના વિકાસના કામોની મંજૂરી આપવામાં આવી હતી. સાથે વિપક્ષ દ્વારા પણ એવા આક્ષેપ કરવામાં આવ્યા હતા કે, અમદાવાદ મ્યુનિસિપલ કોર્પોરેશનનું જે પણ બજેટ મંજુર થાય છે. તેમાંથી 100 ટકા કામ કરવામાં આવતા નથી.
ફાયર વિભાગની ભૂલથી યુવતી મૃત્યુ પામી : અમદાવાદ મ્યુનિસિપલ કોર્પોરેશનના વિપક્ષના નેતા શહેઝાદ ખાન પઠાણ સત્તા પક્ષ પર આક્ષેપ કરતા જણાવ્યું હતું કે, અમદાવાદ શહેરનું દર વર્ષે કોર્પોરેશનનું 1000 કરોડનું બજેટ હોય છે. પરંતુ ઈમરજન્સી સમયે જે સાધન ઉપયોગમાં આવવાના હોય તે ઉપયોગમાં આવતા નથી. તેજ ઘટના થોડા દિવસ પહેલા જ શાહીબાગમાં બની હતી. 17 વર્ષની છોકરી એ આગમાં બળીને મૃત્યુ પામી હતી. ફાયર વિભાગ દ્વારા સ્નોર સ્કેલ છે તે સમયે જરૂર હતી તે જ સમયે ખુલી ન હતી. જેના કારણે આ યુવતી મૃત્યુ પામી હતી. સ્નોર સ્કેલ 21 મીટર સુધી પહોંચી શકી ન હતી. હાલમાં અમદાવાદ કોર્પોરેશન પાસે 82 મીટરની 1 સ્નોર સ્કેલ અને 54 મીટરની 1 સ્નોર સ્કેલ છે.
AMC 18 ફાયર સ્ટેશન : વધુમાં જણાવ્યું હતું કે. એક લાખની વસ્તીએ એક ફાયર સ્ટેશન હોવું ખૂબ જ જરૂરી છે. પરંતુ અમદાવાદ શહેરની વસ્તી 1 કરોડથી પણ ઉપર છે, ત્યારે અમદાવાદ શહેરમાં માત્ર 18 જ ફાયર સ્ટેશન આવી રહ્યા છે. એક બાજુ અમદાવાદ શહેરના પોશ વિસ્તારમાં 100 મીટરથી પણ ઊંચી બિલ્ડિંગ બનાવવાની મંજૂરી આપવામાં આવે છે. પરંતુ એ પહેલા અમદાવાદ મ્યુનિસિપલ કોર્પોરેશન દ્વારા ફાયર સ્ટેશન ઉભા કરવામાં આવે તેવી માંગ છે.
પ્રદૂષણને કારણે 200 કરોડનું નુકસાન : વિપક્ષ નેતાએ વધુમાં જણાવ્યું હતું કે, ગુજરાત હાઇકોર્ટ દ્વારા પણ અનેકવાર સાબરમતી મુદ્દે કોર્પોરેશનને ફટકાર પડી છે, પરંતુ અમદાવાદ મ્યુનિસિપલ કોર્પોરેશનના અધિકારી પાસે સાબરમતી નદીના પાણીને સુધારવાનો કોઈ જ પ્લાન નથી. કોતરપુર, ચિલોડા જેવા વિસ્તારમાંથી ગટરનું પાણી સાબરમતીમાં છોડવામાં આવે છે. જેના કારણે કોર્પોરેશન દ્વારા 50 કરોડના ખર્ચે તૈયાર કરવામાં આવેલ ફ્રેન્ચ વેલ બંધ થઈ ગયા છે. જ્યારે બીજી બાજુ કોર્પોરેશન દ્વારા 150 કરોડના ખર્ચે કોતરપુરમાં નવો MLD પ્લાન બનાવવાની વાત કરવામાં આવી રહી છે, પરંતુ અમદાવાદ મ્યુનિસિપલ કોર્પોરેશનને પ્રદૂષણના કારણે જ 200 કરોડનું નુકસાન થઈ રહ્યું છે. જેના કારણે કોંગ્રેસની માંગ છે કે નદીની આસપાસ આવેલી કંપનીઓના કેમિકલ વાળા પાણી તેમજ ગટરના પાણી સાબરમતી નદીમાં ઠાલવતા અટકાવવામાં આવે.
આ પણ વાંચો : Budget 2023 Expectations: કેન્દ્રીય બજેટને લઈને વડોદરાવાસીઓને શું છે આશા-અપેક્ષાઓ?
શાસક પક્ષને મંજૂરી વિના લીધે નિર્ણય : વિપક્ષે અમદાવાદ મ્યુનિસિપલ કોર્પોરેશનના કમિશનર પર પ્રહાર કરતાં જણાવ્યું હતું કે, AMCના અધિકારીઓ વ્યવસ્થિત કામ કરતા નથી. જેના કારણે ગરીબ માણસને હેરાન થવાનો સમય આવ્યો છે. કોર્પોરેશનના સફાઈ કર્મચારીઓ યોગ્ય રીતે સાફ સફાઈ કરતા નથી. જેના કારણે ચા વાળાને હેરાન કરવામાં આવે છે. તેવી જ રીતે અમદાવાદ મ્યુનિસિપલ કોર્પોરેશનના કમિશનર પણ શાસક પક્ષ કે વિપક્ષની મંજૂરી લીધા વિના પેપર કપ પર પ્રતિબંધ લેવામાં આવ્યો છે. તેથી વિનંતી કરવામાં આવે છે કે અધિકારી કોઈપણ નિર્ણય લેતા પહેલા ચૂંટાયેલા નેતાને પૂછવામાં આવે ત્યારબાદ જ અમલમાં મૂકવામાં આવે તે ખૂબ જરૂરી છે.
આ પણ વાંચો : Union Budget 2023 રત્ન કલાકારોને આવાસથી લઈ ડ્યૂટી ઘટાડવા સુધી આવી છે હીરા ઉદ્યોગકારોની આશા
ડ્રેનેજ ખરાબ થાય છે : સ્ટેન્ડિંગ કમિટીના ચેરમેન હિતેશ બારોટએ જણાવ્યું હતું કે, વિપક્ષ દ્વારા જે પણ આક્ષેપો કરવામાં આવ્યા છે તે ખોટા છે. કમિશનર દ્વારા જે નિર્ણય પેપર કપ મુદ્દે લેવામાં આવ્યો છે. તે સત્તા પક્ષની મંજૂરી મેળવ્યા બાદ જ નિર્ણય લેવામાં આવ્યો છે. અમે કોઈ ગરીબને હેરાન કરવા માંગતા નથી, પરંતુ રસ્તા ઉપર જે ચા ના કપ નાખવામાં આવે છે. તેના કારણે ડ્રેનેજ લાઇન ખરાબ થાય છે. અનેક કોર્પોરેશન દ્વારા નાના કપ પર જ પ્રતિબંધ મૂક્યો છે. બીજા કોઈ અન્ય કાગળના કપ પર પ્રતિબંધ મૂકવામાં આવ્યો નથી.
