કોરોનાની પરિસ્થિતિમાં કોઈના પણ વિરુદ્ધ જૂઠા આક્ષેપો કરવાં સહેલા છે, પરંતુ કામ કરવું અને જનસેવા કરવી અઘરી હોય છે: ભરત પંડ્યા

ભાજપ પ્રદેશ પ્રવક્તા ભરત પંડયાએ કોંગ્રેસ પર નિશાન સાધતા જણાવ્યું હતું કે, કોરોનાની પરિસ્થિતિમાં કોઈના પણ વિરુદ્ધ બોલવું કે જૂઠા આક્ષેપો કરવાં સહેલા છે. ખરેખર તો કામ કરવું , સારું કરવું અને જનસેવા કરવી એ અઘરું હોય છે.

અમદાવાદ : કોંગ્રેસ સેવા-કાર્ય કરતી નથી, એટલે કોઈપણ મુદ્દે વિવાદ ઉભો કરીને બેબૂનિયાદ આક્ષેપ કરવાનું કામ કરી રહી છે. કોંગ્રેસ નકામી વાતોને રાજકારણનો મુદ્દો બનાવવાં નિષ્ફળ પ્રયાસ કરી રહી છે. દેશનાં કોઈપણ રાજ્યમાં N-95 માસ્ક 150 થી 250 રૂ|. મળે છે. મુખ્યમંત્રી વિજય રુપાણીની રાજ્ય સરકારે N-95 માસ્કની કિંમત 65 રૂ. નક્કી કરીને બધાં લોકોને મળી શકે તે માટે અમૂલ પાર્લર દ્વારા વ્યવસ્થા ગોઠવી છે. એક બાજુ માસ્કમાં કાળા બજાર થાય છે, તેવાં કોંગ્રેસ આક્ષેપો કરી રહી છે, ત્યારે બીજી બાજુ રાજ્ય સરકારે N-95 માસ્ક ના 65 રૂ. ફિક્સ કર્યા ત્યારે તેનો વિરોધ કરી રહી છે. કોંગ્રેસ બે મોઢાની વાત કરી રહી છે, કોંગ્રેસ પાણીમાંથી પોરા કાઢવાનો પ્રયાસ કરીને તેનો વિવાદ-વિરોધ કરે છે.

ભાજપ પ્રવક્તા ભરત પંડયાએ જણાવ્યું હતું કે, કોંગ્રેસ સિવિલ હોસ્પિટલનાં કોરોના વોરિયર્સ સામે સીધો કે આડકતરો આક્ષેપ કરીને હતાશાનું વાતાવરણ ઊભું કરવાં માંગે છે. સિવિલમાં ડોકટર્સ, નર્સ, પેરામેડિકલથી માંડીને સફાઈ કામદારો સુધીનો સ્ટાફ પોતાની જાન જોખમમાં મુકીને કોરોના દર્દીની સારવાર કરી રહ્યાં છે. કેટલાંક તો તેમનાં પરિવારને પણ મળી શકતાં નથી અને કેટલાંકને પોતાને કોરોના પોઝિટિવ આવ્યો હોવાં છતાં ભયભીત થતાં નથી. આવાં કોરોના વોરિયર્સને પ્રોત્સાહિત કરવાને બદલે કોંગ્રેસ તેમને હતોત્સાહ કરવાનું કામ કરી રહી છે, તે યોગ્ય નથી.