અમદાવાદ : પ્રિન્સ કહે છે કે, ' સમરસ હોસ્ટેલમાં ઘણી સારી સુવિધા હતી, પરંતુ ખોટ હતી તો ઘરના વાતાવરણની છઠ્ઠી તારીખે જ્યારે મારો પ્રથમ ટેસ્ટ નેગેટિવ આવ્યો ત્યારથી જ એક પ્રકારની આતુરતા શરીરમાં વ્યાપી ગઈ કે હવે ઘરે જવાનું નિશ્ચિત છે.
રાત તો જેમ તેમ કરીને પસાર કરી સવાર પડતા જ સુરજના કિરણો રૂમમાં પ્રવેશ્યા અને પાછો મનમાં સંચાર થવા લાગ્યો. ક્યારે ઘરે જઈશું? તેવુ કરતા-કરતા રાતના દસ વાગ્યા મેં હોસ્પિટલના સમરસ હોસ્ટેલના ઇન્ચાર્જ આઈએએસ અધિકારી દિલીપ રાણાને સીધો ફોન કર્યો કે સાહેબ મારે ઘરે જવું છે. મારો જીવ મુંઝાય છે અને સાહેબે અત્યંત સંવેદનાથી સાંભળીને સીધી હોસ્પિટલમાં સુચના આપી અને તરત જ મારા માટે એક ખાસ એમ્બ્યુલન્સની વ્યવસ્થા કરવામાં આવી. મને રાત્રે બાર વાગે ઘરે પહોંચાડવામાં આવ્યો. જો કે મને ઘરે જવાની ઉતાવળ એટલે પણ હતી કે એ દિવસે મારી મમ્મીનો જન્મદિવસ હતો અને હું ઈચ્છતો હતો કે જન્મદિવસે હું મમ્મી પાસે પહોંચુ અને મારી મમ્મી પણ એવું વિચારતી હતી કે આજે મારો prince મારી પાસે હોત તો કેવું સારું! અને ખરેખર તંત્રએ મને મારી મમ્મી પાસે મોકલ્યો. તંત્રનો ખુબ ઋણી છું.' તેવુ તેને ઉમેર્યુ.
યોગાનુયોગ માતૃ દિન પૂર્વે, માતાના જન્મદિને માતાના ખોળામાં પ્રિન્સે માથું મૂક્યુ અને વિમળા દેવી બોલ્યા, આવી ગયો બેટા? અને પ્રિન્સ ચોધાર આંસુએ રડી પડ્યો.
