તહેવારોમાં મ્યુનિસિપલ હોસ્પિટલોમાં તબીબો રહેશે ખડે પગે

અમદાવાદઃ દિવાળીના તહેવારો દરમિયાન ખાનગી હોસ્પિટલ અને ડૉકટર્સ રજા પર હોય છે. પરંતુ, અમદાવાદ મ્યુનિસિપલ હોસ્પિટલો અને સીએચસી સેન્ટરોમાં તહેવારોમાં પણ તબીબો હાજર રહેશે.

દિવાળીના તહેવારો દરમિયાનમાં શહેરના નાગરિકોને કોઈપણ પ્રકારની તકલીફ ન પડે તે મ્યુનિસિપલ તંત્રના તમામ વિભાગના વડા અને અધિકારીઓ સાથે મેયર અને સ્ટેન્ડિંગ કમિટીના ચેરમેને મીટીંગ કરી હતી. તહેવાર દરમિયાન પાણી, ડ્રેનેજને કારણે કોઈ તકલીફ ન પડે તે માટે સૂચના આપવામાં આવી હતી. શહેરની શારદાબેન હોસ્પિટલ, એલ.જી હોસ્પિટલ સહિતની મ્યુનિસિપલ હોસ્પિટલ તેમજ 7 સીએચસી સેન્ટરોમાં ત્રણ શિફ્ટમાં ડોક્ટર્સ, RMO-CMO સતત કાર્યરત રહેશે.

આ ઉપરાંત દિવાળીના તહેવાર માટે શહેરના તમામ બ્રિજ ઉપર લાઈટીંગ કરવામાં આવશે. મ્યુનિસિપલ કોર્પોરેશન બિલ્ડીંગને શણગારવામાં આવશે. દરેક ઝોનમાં આવેલ 5- 5 ધાર્મિક સ્થાનોને સાફ કરવામાં આવશે. જેમાં કોર્પોરેટરોને પણ જોડવવા માટે અપીલ કરવામાં આવી છે. દિવાળીના તહેવારની રજાનો લાભ લઇ ગેરકાયદેસર બાંધકામ ન થાય તે માટે પણ તકેદારી રાખવા માટે એસ્ટેટ વિભાગને જાણ કરવામાં આવી છે.