Suicide Case: અમદાવાદમાં કિડનીની બીમારીથી કંટાળી યુવતીએ જીવન ટુંકાવ્યું

કોઈ વ્યક્તિ સતત ડિપ્રેશનથી પોતાનું જીવન ટૂંકાવે એવી ઘટના તો સમયાંતરે બને છે, પરંતુ કોઈ દર્દી પોતાની બીમારીથી કંટાળીને જીવન ટૂંકાવે એવી ઘટના હોસ્પિટલમાં પણ બનતી હોય છે. અમદાવાદની એસ.વી.પી હોસ્પિટલમાંથી પણ આવો કિસ્સો સામે આવ્યો છે. જેમાં 25 વર્ષીય યુવતીએ કિડનીની બીમારીથી કંટાળી જઈને મોતની છલાંગ લગાવી દીધી હતી. છેલ્લા ત્રણ મહિનાથી સારવાર માટે આવતી યુવતી આખરે બીમારીથી થાકી જઈ જીવન પડતું મૂકવા માટે તૈયાર થઈ હતી.

અમદાવાદ: અમદાવાદ શહેરની અલીના શેખ નામની યુવતી કિડનીની બીમારીની સારવાર માટે છેલ્લા ત્રણ મહિનાથી એસ.વી.પી હોસ્પિટલમાં આવતી હતી. હોસ્પિટલના 12માં ફ્લોર ઉપર પતિ તેમજ નણંદ સાથે ડાયાલિસિસ માટે ગઈ હતી. પાણીની તરસ લાગી છે, એવું કહીને તે બહાર ગઈ અને પછી મોતની છલાંગ લગાવી દીધી હતી. કિડનીની બીમારીથી કંટાળી જઈને યુવતીએ આ પગલું ભર્યું હોવાનું માનવામાં આવી રહ્યું છે. સમગ્ર ઘટનાની જાણ થતા પોલીસ યુદ્ધના ધોરણે હોસ્પિટલ પહોંચી હતી. આત્મહત્યા કરવા પાછળનું સાચું કારણ પતિ તેમજ પરિવારજનોના નિવેદન બાદ પોલીસ તપાસમાંથી સામે આવશે.

પોલીસ ઘટના સ્થળે: માહિતી મળતાની સાથે જ એલિસબ્રિજ પોલીસે ઘટના સ્થળે પહોંચીને તપાસ હાથ ધરી છે. અમદાવાદની SVP હોસ્પિટલના 12માં માળે કિડનીની બીમારીની સારવાર લઈ રહેલી અલીના શેખ નામની યુવતીએ આત્મહત્યા કરી છે. જેમાં અલીના શેખને ઘણાં સમયથી કિડનીની બીમારી હોય તે ડાયાલિસિસની સારવાર માટે SVP હોસ્પિટલમાં છેલ્લા ત્રણ મહિનાથી ડાયાલિસિસ કરાવવા માટે આવતી હતી. જોકે અંતે પોતાની કિડનીની બીમારીથી કંટાળીને તેણે આ પગલું ભર્યું હોવાનું સામે આવ્યું છે.મૃતક અલીના શેખ SVP હોસ્પિટલમાં 12માં માળે ડાયાલિસિસ માટે પતિ અને નણંદ સાથે સવારે 9 વાગે ગઈ હતી. પતિ અને નણંદ સાથે હોય તે સમયે પોતાને પાણીની તરસ લાગી છે, તેવું કહીને પાણી પીવાના બહાને બહાર નીકળી હતી. જે બાદ હોસ્પિટલના બારમાં માળેથી નીચે પડતું મૂકી આત્મહત્યા કરી હતી.

કયા કારણોસર આપઘાત: આ સમગ્ર મામલે ઘટનાની જાણ થતા એલિસબ્રિજ પોલીસે ઘટના સ્થળે પહોંચીને મૃતદેહને પીએમ માટે મોકલ્યો હતો. યુવતીએ કયા કારણોસર આપઘાત કર્યો તે ખરી હકીકત જાણવા માટે તેના પતિ અને અન્ય પરિવારજનોના નિવેદન લેવા માટેની પ્રક્રિયા હાથ ધરી છે. આ સમગ્ર મામલે અકસ્માત મોત દાખલ કરી વધુ તપાસ પોલીસે શરૂ કરી છે. અમદાવાદ શહેરમાં આત્મહત્યાના કિસ્સાઓમાં સતત વધારો થઈ રહ્યો છે.

ઘરમાં આપઘાત કર્યો: હજુ એક દિવસ પહેલાં જ નરોડા વિસ્તારમાં એક સગીરાએ ઘરમાં આપઘાત કર્યો હતો. ત્યારે તે મામલે પણ પોલીસે આત્મહત્યા પાછળના કારણો જાણવા માટેની તપાસ તજ શરૂ કરી છે. ત્યારે વધુ એક આત્મહત્યાનો કિસ્સો સામે આવ્યો છે. આ અંગે એલિસબ્રિજ પોલીસ સ્ટેશનના પી.આઈ બી.જી ચેતરીયાએ જણાવ્યું હતું કે પોલીસને જાણ થતા પોલીસે ઘટના સ્થળે પહોંચીને મૃતદેહને પીએમ માટે મોકલ્યો છે. આ મામલે પરિવારજનોના નિવેદન લઈને આત્મહત્યા પાછળનું કારણ જાણવા માટે તપાસ હાથ ધરવામાં આવી છે.