અમદાવાદઃ અમદાવાદ શહેરમાંથી કિન્નરનો ત્રાસ હોવાનું સામે આવ્યું છે. અમદાવાદ એલિસબ્રીજ પોલીસે કિન્નર સામે છેત્તરપિંડીની ફરિયાદ નોંધીને જુદા જુદા સોર્સ આધારિત તપાસ શરૂ કરી છે. અમદાવાદમાં ઠગાઈના અનેક કિસ્સાઓ પોલીસ નોંધાયા છે. પરંતુ એલિસબ્રિજ વિસ્તારમાં એક કિન્નર સામે છેતરપિંડીની ફરિયાદ નોંધાઈ છે.
દુઃખ દૂર કરવાની વાતઃ એક ઘરમાં મહીલા તેના સાસુ અને દેરાણી સાથે ઘરે હાજર હતી, તે દરમિયાન ઘરે આવેલ કિન્નરે તેને વિશ્વાસમાં લઇને ઘરના દુઃખ દુર કરવાની લાલચ આપી અને વિધિ કરવાના બહાને રોકડ તેમજ દાગીના લઇને ફરાર થઇ જતા આ અંગે પોલીસ ફરિયાદ નોંધાઈ છે. આંબાવાડી વિસ્તારમાં રહેતી એક મહિલાએ એલીસબ્રીજ પોલીસ સ્ટેશનમાં પોલીસ ફરિયાદ દાખલ કરાવી છે.
આવી હતી ઘટનાઃ તારીખ 14મી મેના રોજ તે ઘરે હાજર હતી, તે દરમિયાન સવારના સાડા દશ વાગ્યાની આસપાસ એક કિન્નર તેમના ઘરે આવ્યો હતો. મહિલાએ તેને ચા પીને જવાનું કહીને ઘરમાં બોલાવીને બેસાડ્યા હતા. જ્યાં આ કિન્નરે મહિલાને તેના ઘરમાં બહુ તકલીફો ચાલે છે, તમારા ઘરની વિધિ કરવી પડશે, દરવાજા બંધ કરી દો અને એક ગ્લાસમાં પાણી કંકુ અને ચોખા નાખીને આપો, તેમ કહેતા મહિલા તેની વાતોમાં આવી ગઈ હતી.
આવા નાટક કર્યાઃ કિન્નરને મહિલાએ વસ્તુઓ આપતા તેણે ગ્લાસને ઘરમાં ફેરવીને ઘરની નજર ઉતારી દીધી છે. તેમ કહીને તે પાણી જાતે પીને તમારા બધા દુઃખ હું પી ગઈ છું. તેમ જણાવ્યું હતું. કિન્નરે ફરિયાદી પાસે ઘીના પૈસા માગતા ફરિયાદીએ તેને 1100 રૂપિયા આપ્યા હતા. પરંતુ કિન્નરે એક રૂપિયો લઇને બીજા પૈસા પાછા આપ્યા હતા. કહ્યું હતું કે હું તારી પરીક્ષા કરતો હતો. તું માતાજીને પૈસા આપે છે કે નહીં.
મંદિરમાં મૂકો પૈસાઃ આ પછી તેણે કહ્યું હતું કે, તમારા ઘરમાંથી રૂપિયા 32 હજાર લઈ મંદિરમાં મૂકી દો. તમારા ઘરનું બધું સારું થઈ જાય બાદ તમે આ પૈસા માતાજી પાછળ વાપરી દેજો. જોકે ફરિયાદી પાસે હાલ આટલા રૂપિયા ના હોવાનું કહેતા, તમારી તિજોરીમાં જ્યાં હાથ નાખશો ત્યાં પૈસા થઈ જશે તેમ કહીને એક રૂમાલ મૂક્યો હતો. જેમાં ફરિયાદીએ રૂપિયા 4000 મુકતા કિન્નરે ત્રણ સોનાના દાગીના મૂકો હું વિધિ કરી આપુ, બાદમાં દૂધમાં ધોઈને પહેરી લેજો તેમ કહેતા ફરિયાદીએ રૂપિયા 45 હજારની કિંમતના ત્રણ દાગીના પણ રૂમાલમાં મૂક્યા હતા.
વિધિ કરવાનું કહી પલાયનઃ હું વિધિ કરીને હમણાં બે કલાકમાં આવું છું, ત્યાં સુધી તમે જમવાનું બનાવી રાખો તેમ કહીને નીકળી ગયા બાદ કિન્નર ઘરે પરત ન આવતા મહિલાએ સમગ્ર ઘટનાની જાણ પોલીસને કરી હતી અને પોલીસે આ મામલે ફરિયાદ દાખલ કરીને વધુ તપાસ શરૂ કરી છે. સમગ્ર કેસ અંગે એલિસબ્રીજ પોલીસ સ્ટેશનના તપાસ અધિકારી PI બી.જી ચેતરિયાએ સમગ્ર કેસ અંગે વિગતો આપી છે.
"આ અંગે ફરિયાદના આધારે ગુનો નોંધી આરોપીની ધરપકડ માટે ટીમો કામે લગાડી છે. આરોપીના ઝડપાયા બાદ આ અંગે વધુ તપાસ હાથ ધરાશે. મહિલાની ફરિયાદના આધારે કિન્નરને પકડવા માટે પોલીસે પગલાં લીધા છે."---બી.જી ચેતરિયા (એલિસબ્રિજ પોલીસ સ્ટેશનના PI)
CCTVના આધારે તપાસ શરૂઃ પોલીસ વિભાગના સુત્રોના જણાવ્યા અનુસાર પોલીસે સીસીટીવીના આધારે પોલીસ તપાસ શરૂ કરી છે. કિન્નર સાથે કોઈ રીક્ષા ચાલક પણ આવ્યો હોવાનું જાણવા મળ્યું છે. રીક્ષા ચાલક સહિત આ કિન્નર સુધી પહોંચવા માટે પોલીસે જુદી જુદી દિશામાં તપાસ શરૂ કરી દીધી છે.
