કોલંબો: શ્રીલંકાની પોલીસે શુક્રવારે 2011 વર્લ્ડ કપ ફાઇનલમાં ભારત સામે તેમની ટીમની હાર ફિક્સ કરવાના આક્ષેપોની તપાસ બંધ કરી દીધી હતી અને કહ્યું હતું કે દિગ્ગજ ક્રિકેટર કુમાર સંગાકારા અને મહેલા જયવર્દનેના નિવેદનો નોંધ્યા પછી તેમની પાસેથી અમને કોઈ પુરાવા મળ્યા નથી.
પોલીસ અધિકારી જગત ફોંસેકાએ પત્રકારો સાથે વાત કરતાં જણાવ્યું કે, અમે 2011 વર્લ્ડકપ મેચ ફિક્સિંગના આરોપની તપાસ શરૂ કરી હતી. અરવિંદ ડી સિલ્વા દ્વારા આપવામાં આવેલા નિવેદનના આધારે અમે 2011 વર્લ્ડકપના ખેલાડી ઉપલ થરંગાને પૂછપરછ માટે બોલાવવાનો ફેંસલો લીધો છે. ફાઇનલમાં થરંગાએ ઓપનિંગમાં આવીને 20 બોલ પર માત્ર બે રન બનાવ્યા હતા.
2011ની વર્લ્ડકપ ફાઈનલમાં ભારતે શ્રીલંકાને 6 વિકેટથી હાર આપી હતી. ટૉસ જીતીને શ્રીલંકાના કેપ્ટન કુમાર સંગાકારાએ પહેલા બેટિંગ કરવાનો ફેંસલો કર્યો હતો. જયવર્ધનેની સદીના સહારે શ્રીલંકાએ 275 રનનો ટાર્ગેટ આપ્યો હતો. જેના જવાબમાં ભારતે ગંભીરના 98 અને ધોનીના અણનમ 91 રન વડે બીજી વખત વર્લ્ડકપ જીત્યો હતો.
ડી સિલ્વા શ્રીલંકાએ 1996નો વર્લ્ડકપ જીત્યો તેમાં મેન ઓફ ધ મેચ રહ્યો હતો. તેણે શ્રીલંકા તરફથી 308 વન ડેમાં 11 સદી અને 64 અડધી સદી વડે 9284 રન બનાવ્યા છે. જ્યારે 93 ટેસ્ટમાં 20 સદી અને 22 અડધી સદી વડે 6361 રન બનાવ્યા છે.
ભૂતપૂર્વ રમત પ્રધાન મહિન્દાનંદા અલુથગામાગે આરોપ લગાવ્યો હતો કે મેચ ફિક્સ થઈ હતી, જેના પગલે પોલીસની સ્પેશિયલ ઇન્વેસ્ટિગેશન ટીમ દ્વારા તપાસ શરૂ કરવામાં આવી હતી.
