હૈદરાબાદ: કોરોના રોગચાળા દરમિયાન જરૂરિયાતમંદોના મસીહા બનનારા સોનુ સૂદે ફરી એકવાર પોતાના ઉમદા હેતુથી લોકોનું દિલ જીતી લીધું છે. અભિનેતાએ તેલંગાણાના ત્રણ અનાથ બાળકોની જવાબદારી લેવાનું વચન આપ્યું છે. આ બાળકોના માતાપિતાનું નિધન થઇ ગયું છે.
લોકડાઉનમાં ફસાયેલા પ્રવાસીઓની મદદ માટે અભિનેતા મદદ માટે સામે આવ્યા હતા. તેમણે ખેડૂતને ટ્રેકટર આપીને પણ મદદ કરી હતી. હવે સોનુએ આ બાળકોની જવાબદારી લીધી છે. એક યૂઝરે ટ્વિટ કરી આ ત્રણેય બાળકોની સ્થિતિ વિશે વાત કરી હતી જે બાદ સોનુએ ટ્વિટ કર્યું કે, "તેઓ (ત્રણેય બાળકો) અનાથ નથી. તેઓ મારી જવાબદારી છે."
સૂત્રોના જણાવ્યા અનુસાર આ બાળકોના પિતાનું અવસાન થઈ ચૂક્યું હતું, તેની માતાનું પણ હાલમાં જ અવસાન થયું છે અને તેમની દાદી ખૂબ જ વૃદ્ધ છે.આ ત્રણેય બાળકોનું ગામ આત્માકુર રેડ્ડી વિધાનસભા ક્ષેત્રમાં આવે છે. રાજ્યના પ્રધાને આ મામલે તેલુગુ ફિલ્મ નિર્માતા દિલ રાજુને માહિતી આપી અને તેમને બાળકો દત્તક લેવાની વિનંતી કરી. રાજુએ પોતાના લોકોને ગામ મોકલવા અને બાળકોની જવાબદારી લેવાનું કહ્યું હતું.
