ન્યૂઝ ડેસ્ક : આ સાઇબર અપરાધીઓ દ્વારા તાજા કૌભાંડો પૈકીનું એક કૌભાંડ છે. તેમનું લક્ષ્ય અગાઉની આંધ્ર બૅન્કના ગ્રાહકો છે. આંધ્ર બૅન્કનું તાજેતરમાં યુનિયન બૅન્કમાં વિલિનીકરણ થઈ ગયું છે. કૌભાંડીઓ ગ્રાહકોને ગેરમાર્ગે દોરતા લેખિત સંદેશાઓ મોકલી રહ્યા છે. કૌભાંડની જાળમાં સપડાઈને કેટલાક પીડિતોએ લાખો રૂપિયા ગુમાવ્યા છે. બૅન્કના અધિકારીઓનો સંપર્ક કર્યા પછી તેઓ સમજ્યા કે તેમની સાથે ઠગાઈ થઈ છે. હવે તેઓ સાઇબર ક્રાઇમ પોલીસ તરફ જોઈ રહ્યા છે.
કસ્ટમરની માહિતી તફડાવ્યા પછી આ કૌભાંડીઓ નિવૃત્ત અધિકારીઓ અને ગૃહિણીઓને આવા લેખિત સંદેશાઓ મોકલી રહ્યા છે. પોલીસ કહે છે કે તેઓ આ લક્ષ્ય કરાયેલા સમૂહો તરફથી ઝડપી પ્રતિસાદનું અનુમાન કરીને આમ કરી રહ્યા છે. રોકડ ઉપાડના લેખિત સંદેશ મળ્યા પછી પીડિતો ભયમાં આવી જાય છે અને કૌભાંડીઓનો સંપર્ક કરે છે. બીજી તરફ કૌભાંડીઓ અસ્ખલતિ હિન્દી અને અંગ્રેજીમાં બોલે છે, ગ્રાહકોનાં નામ અને સરનામાની સાચી વિગતો આપે છે. હૈદરાબાદના બંજારા હિલ્સમાં રહેતા એક પૂર્વ બૅન્ક અધિકારીની સાથે આ રીતે ઠગાઈ થઈ છે. તેમના તરફથી યુપીઆઈ ક્રમાંક મળ્યા પછી કૌભાંડીઓએ તેમના ખાતામાંથી ૯૦,૦૦૦ ઉપાડી લીધા.
સાઇબર અપરાધીઓ નેટ બૅન્કિંગની વિગતો સાથે ગ્રાહકોની વિગતો તફડાવે છે. તેઓ રોજ લગભગ ૧૦૦થી ૨૦૦ ગ્રાહકોને લેખિત સંદેશાઓ મોકલે છે. એવું લાગે કે તેમનો એસએમએસ આંધ્ર બૅન્કે જ મોકલ્યો છે. તેમાં આવું લખાણ હોય છે- You have withdrawn INR 25,000 from Andhra Bank ATM. If this transaction was not done by you, send an SMS to 9298112345. Call 18004251515 immediately to block your card. જ્યારે ગ્રાહકો આ ક્રમાંકો પર કૉલ કરે છે ત્યારે કૌભાંડીઓ બૅન્ક અધિકારીઓ તરીકે વર્તે છે અને પીડિતોને ખાતરી આપે છે કે આ રકમ તેમના ખાતામાં જમા કરી દેવાશે. તેઓ પીડિતોના ફૉન પર એક લિંક મોકલે છે અને તેમને તેના પર ક્લિક રવા કહે છે. પીડિત આ લિંક પર ક્લિક કરે છે તો તેમાં તેમને તેમના યુપીઆઈ સાથે જોડાયેલ બૅન્ક ખાતાની વિગતો આપવા કહેવાય છે.
પીડિતો બીજું કંઈ વિચાર્યા વગર તેમ કરે છે. યુપીઆઈની આ વિગતો સાથે કૌભાંડીઓ ગ્રાહકોના ખાતામાંથી નાણાં ઉપાડી લે છે. જ્યાં સુધી પીડિતોને જાણ થાય કે તેમની સાથે કૌભાંડ થયું છે ત્યાં સુધીમાં સાઇબર અપરાધીઓ ફૉન કૉલ કાપી નાખે છે અને તેમનો ફૉન સ્વિચ ઑફ કરી નાખે છે.
