સુરત: કોરોના કાળમાં હજારોની સંખ્યામાં લગ્ન પ્રસંગ રદ થયા છે. જેથી લગ્નસરાની સિઝન સાથે સંકળાયેલા વેપારીઓની આર્થિક સ્થિતિ ખરાબ થઇ છે. આ સાથે જ પાર્ટી પ્લોટ, મંડપ ડેકોરેશન, ઇવેન્ટ મેનેજર, બગી, બેન્ડ વાજા, ડીજે, કેટરર્સ વગેરે ધંધા સાથે સંકળાયેલા લોકોને પણ હાલાકીનો સામનો કરવો પડી રહ્યો છે.
આ વ્યવસાય સાથે સંકળાયેલા લોકોને અત્યાર સુધી કરોડો રૂપિયાનું નુકસાન થયું છે. આ ઉપરાંત હજારો લોકો બેરોજગાર પણ બન્યા છે. જેથી આજે એટલે કે સોમવારે આ વ્યવસાય સાથે સંકળાયેલા લોકો સુરત જિલ્લા કલેક્ટર કચેરી પહોંચ્યા હતા. ત્યારબાદ આ લોકોએ કલેક્ટરને આવેદનપત્ર પાઠવ્યું હતું. આ લોકો જે બેનરો સાથે વિરોધ કરવા આવ્યા હતા. તેમાં લખ્યું હતું કે,'ભાજપાની રેલીમાં 200 લોકોને સામેલ થવા અને ગરબા રમવાની છૂટ મળી શકતી હોય તો નવરાત્રીમાં ગરબા રમવાની છૂટ કેમ ન મળી શકે.'
આ તમામ લોકો દ્વારા માગ કરવામાં આવી છે કે, એક પછી એક દરેક વ્યવસાયને સરકાર દ્વારા ધીરે ધીરે છૂટ આપવામાં આવી રહી છે, ત્યારે આ વ્યવસાય સાથે સંકળાયેલા લોકોની સાથે અન્યાય ન કરવામાં આવે. નીતિ-નિયમો સાથે તેમનો વ્યવસાય ફરીથી શરૂ કરવા દેવાની અનુમતિ આપવામાં આવે તેવી તેમણે માગ કરી હતી.
