સુરતમાં ડાયમંડ વેપારી અને ટેકસ્ટાઈલ્સ વેપારીની 2 દીકરીઓ સહિત આઠ મુમુક્ષોએ દીક્ષા લીધી

હીરા નગરી સુરતમાં દીક્ષાના સોપાનમાં વધુ એક દિક્ષાનો ઉમેરો થયો છે. જેમાં એક સાથે આઠ જેટલા મુમુક્ષોએ દીક્ષા લઈ સંયમનો માર્ગ અપનાવ્યો છે. ડાયમંડ વેપારી અને ટેકસ્ટાઈલ્સ વેપારીની બે દીકરીઓ સહિત આઠ મુમુક્ષોએ સુરતના વેસુ સ્થિત મહાવિદેહ ધામ ખાતે બસો જેટલા ગુરુભગવંતો અને હજારોની સંખ્યામાં હાજર જૈન સમાજના લોકોની ઉપસ્થિતિમાં દીક્ષા ગ્રહણ કરી હતી.

સુરતઃ સુરત શહેર હીરા નગરી અને ડાયમંડ નગરી તરીકેની પોતાની એક ઓળખ ધરાવે છે. પરંતુ હવે સુરતને દીક્ષા નગરી તરીકે પણ લોકો ઓળખતા થયા છે. જેની પાછળનું કારણ છે કે, સુરતની પાવન ભૂમિ પર દિક્ષાનો અવિરતપણે પ્રવાહ જોવા મળી રહ્યો છે. સુરતના આંગણે બુધવારના રોજ એકસાથે આઠ જેટલા મુમુક્ષોએ સાંસારિક જીવનના તમામ સુખ અને મોહ- માયા ત્યાગી સાધુ જીવનનો માર્ગ અપનાવ્યો છે. મુંબઈ અને સુરતના ટેકસ્ટાઈલ્સ વેપારી સહિત ડાયમંડ વેપારીની બે દીકરીઓએ તમામ સુખો ત્યાગી સંયમ માર્ગ અપનાવ્યો છે. સુરતના ચાર, મુંબઈના ત્રણ સહિત અમદાવાદના એક મળી કુલ આઠ મુમુક્ષોએ વેસુના મહાવિદેહ ધામ ખાતે દીક્ષા ગ્રહણ કરી હતી. આચાર્ય ગુણરત્નસુરીસવરજી મહારાજની નિશ્રામાં યોજાયેલ દિક્ષા કાર્યક્રમમાં હજારોની સંખ્યામાં જૈન સમાજના લોકો હાજર રહ્યા હતા. દીક્ષા સમારોહમાં મુંબઈના મલાડની રહેવાસી ભવ્યા પ્રદીપ મેગાતર જે સી.એસ.કરી ચુકી છે અને તેણીએ બુધવારના રોજ 200 ગુરુભગવંતોની ઉપસ્થિતિમાં સંયમનો માર્ગ અપનાવી હંમેશા માટે સાધુ જીવન તરફ પ્રયાણ કરી લીધો છે. ભવ્યાએ સી.એસ કર્યા બાદ તેણીનું ફિલ્મ ઓડિશન કર્યું હતું. જ્યાં તેણીને લાખોના પગારની ઓફર પણ થઈ હતી. પરંતુ લાખોના પગારની ઓફરને ફગાવી તેણીએ સંયમના માર્ગે જવાનો સંકલ્પ કર્યો હતો. લાખોના પગારની ઓફર અને ફિલ્મમાં કામ કરી તેણી સાંસારિક સુખો મેળવી શકી હોત ,પરંતુ તેણીને સંસારના સુખો કરતા વૈરાગ્ય જીવનમાં સુખ લાગતા સંયમનો માર્ગ અપનાવ્યો છે.

વેસુ ખાતે યોજાયેલ દીક્ષા સમારોહમાં આઠ દિક્ષાર્થીઓમાં એક સુરતની વૈરાની નીતિનભાઈ નામની યુવતીનો સમાવેશ થાય છે. જે બીએએમએસ સુધીનો અભ્યાસ કરી ચુકી છે. વૈરાનીના પિતા ડાયમંડ વ્યવસાય સાથે સંકળાયેલા છે. જો કે પુત્રીના આ નિર્ણયથી તેઓ ખૂબ જ ખુશ જોવા મળ્યા હતા. એક ડાયમંડ વેપારીની દીકરી હોવા છતાં વૈરાનીને પોતાની કરોડોની સંપત્તિમાં સુખ જોવા નહોતું મળ્યું, જે સંયમના માર્ગમાં જોવા મળ્યું. બે વર્ષ સુધી વૈરાની ગુરુ મહારાજની નિશ્રામાં વિહાર કરી ચુકી હતી. જ્યાં બાદમાં તેણીએ સંયમના માર્ગે જવાનો નિર્ણય લેતા પરિવારે રાજીખુશી પરવાનગી આપી હતી.આઠ મુમુક્ષો પૈકીના બે બાળ મુમુક્ષોએ પણ સંયમનો માર્ગ અપનાવ્યો હતો. જેમાં માતા-પિતા વિહોણી અને મામાને ત્યાં રહેતી તેર વર્ષીય સિલ્કી જૈન નામની કિશોરીએ સાધુ જીવન અપનાવ્યો છે. ધોરણ ચાર સુધી અભ્યાસ કરી ચુકેલી સિલ્કી જૈન હાલ મુંબઈ મામાને ત્યાં જ રહેતી હતી અને અવારનવાર ગુરુ મહારાજના ત્યાં શિબિરમાં પણ જતી હતી. જ્યાં મહારાજશાની નિશ્રામાં જ તેણીને ભાવ થયા અને સંયમનો માર્ગ અપનાવવાનો સંકલ્પ કર્યો. આ સાથે જ અમદાવાદ ખાતે ખાનગી કંપનીમાં સેલ્સમેન તરીકેની ફરજ બજાવતા વિમલ પરીખના બાર વર્ષીય પુત્ર જીનેશ પરીખે પણ વેસુ ખાતે દીક્ષા ગ્રહણ કરી સંયમનો માર્ગ અપનાવ્યો છે. સંતાનમાં એક પુત્ર અને એક પુત્રી ધરાવતા પિતા વિમલ પરીખે જણાવ્યું હતું કે પુત્રમાં પહેલાથી ભક્તિનો સંચાર જોવા મળ્યો હતો. પુત્રના નિર્ણય બાદ સાત મહિના સુધી વિચારવાનો તેણે સમય આપવામાં આવ્યો. પરંતુ પોતાના નિર્ણય પર તે અડગ રહેતા દિક્ષાની પરવાનગી આપી.મહત્વનું છે કે, સુરતના વેસુ ખાતે યોજાયેલ આઠ મુમુક્ષોની દીક્ષા ગ્રહણ વિધિમાં સંયમનો માર્ગ અપનાવી ચુકેલી ભવ્યા મેગાતરને લાખોના પગાર નહીં, પરંતુ સાધુ જીવનમાં સુખ લાગ્યું અને તેણીએ ઓફર ફગાવી આ માર્ગે જવાનું પસંદ કર્યું છે. જે અન્ય લોકો આવી ઓફર ફગાવતા પહેલા ઘણું વિચારતા હોય છે.