- શહેર પોલીસ કમિશનરે બહાર પાડ્યું જાહેરનામું
- સુરતમાં 30 ડિસેમ્બરથી કલમ 144 લાગુ
- ચારથી વધુ લોકોને ભેગા થવા પર પ્રતિબંધ
સુરત: સુરત શહેર પોલીસ કમિશનર દ્વારા આજરોજ સોમવારે એક જાહેરનામું પ્રસિદ્ધ કરવામાં આવ્યું છે. જેમાં જણાવ્યા મુજબ આગામી 30 ડિસેમ્બર 2020થી 13 જાન્યુઆરી 2021 સુધી કલમ 144 લાગુ કરવામાં આવી છે. જે મુજબ ચારથી વધુ વ્યક્તિઓના ભેગા થવા પર પ્રતિબંધ લગાવવામાં આવ્યો છે. સુરત શહેરમાં કોરોનાની વર્તમાન પરિસ્થિતિ તેમજ આગામી દિવસોમાં આવતાં તહેવારો, શહેરમાં યોજાતા ધરણા/રેલીઓને ધ્યાને લઈ જાહેરમાં શાંતિ અને સલામતી જળવાઈ રહે તથા કાયદો અને વ્યવસ્થાની પરિસ્થિતિ યથાવત રહે તે માટે શહેર પોલીસ કમિશનર અજય તોમરે જાહેરનામું પ્રસિધ્ધ કર્યું છે.
કોરોના મહામારીને ધ્યાનમાં રાખી બહાર પાડ્યું જાહેરનામું
સુરત પોલીસ કમિશનરે બહાર પાડેલા જાહેરનામા અન્વયે શહેરમાં આગામી 30 ડિસેમ્બરથી 13 જાન્યુઆરી 2021 સુધી ચાર કે તેથી વધુ લોકોના ભેગા થવા પ્રતિબંધ લાગુ કરવામાં આવ્યો છે. જેથી શહેરમાં કોરોનાની પરિસ્થિતિ પર કાબૂ મેળવી શકાય. જાહેરનામાના સમય દરમિયાન કોઈ સભા બોલાવવી કે સરઘસ કાઢવા ઉપર પણ પ્રતિબંધ ફરમાવી દેવામાં આવ્યો છે. જાહેરનામામાં જણાવ્યા મુજબ અપવાદ તરીકે સરકારી, અર્ધસરકારી ફરજ સાથે સંકળાયેલા લોકો તથા સ્મશાનયાત્રાને આ પ્રતિબંધ લાગુ પડશે નહી તેમજ આ હુકમનો ભંગ કરનારા શિક્ષાને પાત્ર થશે એમ શહેર પોલીસ કમિશનર દ્વારા બહાર પાડવામાં આવેલા જાહેરનામામાં જણાવવામાં આવ્યું છે.
