સુરતના સૈયદપુરા પમ્પિંગ સ્ટેશન વિસ્તારના 3 જેટલા યુવકને કોઇ ગુના સંદર્ભે પોલીસ પૂછપરછ માટે લઇ જઇ રહી હતી. ત્યારે એક યુવકની માતાએ પોતાના પુત્રને છોડી મુકવા માટે આજીજી કરી હતી. મહિલા અને પોલીસ કર્મી વચ્ચે શાબ્દિક બોલાચાલી થતા પોલીસ દ્વારા મહિલાને માર મારવામાં આવ્યો હતો.
મહિલાએ આ અંગે જણાવ્યું હતું કે, તે પોતાની બહેનના ઘરે જઈ રહી હતી. તે દરમિયાન પોલીસ ચોકી પર તેના દીકરાને જોયો હતો અને દીકરાને એક તમાચો મારીને કહ્યું હતું કે તે અહીં કેમ છે. ત્યારે મહિલાના દીકરાએ જવાબ આપ્યો હતો કે, મને પોલીસવાળા રિક્ષામાંથી લઈ આવ્યાં છે. મહિલાએ તેના દીકરાને દુકાને કામ કરવા મોકલીને ચોક પર પહોંચી હતી. જ્યાં 2 પોલીસકર્મીઓએ ગાળા ગાળી કરીને જાહેરમાં તમાચા ઝીકી દેતા તે રસ્તા પર પડી ગઈ હતી. ત્યારબાદ મહિલાને 108 મારફતે સારવાર માટે હોસ્પિટલ ખસેડવામાં આવી હતી.
સમગ્ર ઘટના અંગે લાલગેટ પોલીસ મથકના PI પાટીલનું કહેવું છે કે, 3 યુવકોને પુછપરછ માટે લાવવામાં આવ્યા હતા અને પુછપરછ બાદ છોડી દેવામાં આવ્યા હતા. મહિલાને માર મારવામાં આવ્યો હોય, તેવી કોઈ ફરિયાદ પોલીસ ચોપડે નોંધવામાં આવી નથી. મારા માર્યાની વાત ખોટી છે. પોલીસ કર્મચારી અને મહિલા વચ્ચે ફક્ત બોલાચાલી અને રકઝક થઈ હતી. જો કે, આ સમગ્ર ઘટનાના CCTV ફૂટેજ પણ સામે આવ્યા છે. તેમ છતાં મહિલાને માર માર્યો હોવાની ઘટનાથી PI પોતાને અજાણ ગણાવી રહ્યાં છે. તેમજ આ આક્ષેપોને પણ નકારી રહ્યાં છે.
