સુરતમાં પાણી અને મચ્છરજન્ય રોગચાળો વકર્યો, 500થી વધુ લોકો સારવાર હેઠળ, 10થી વધુના મોત

સુરતમાં ઝાડા-ઊલટી, તાવ, વાઇરલ ફિવર, મલેરિયા અને ડેન્ગ્યૂ જેવા પાણીજન્ય તેમજ મચ્છરજન્ય રોગોના 500થી વધુ કેસ મોટા પ્રમાણમાં સિવિલ, સ્મીમેર હોસ્પિટલ અને ખાનગી હોસ્પિટલોમાં આવી રહ્યા છે. સુરત શહેરમાં ઝાડા ઉલટીના લીધે વધુ 2ના મોત નિપજ્યા હતા. ચાલુ સિઝનમાં તાવ અને ઝાડા ઉલટીને કારણે અત્યાર સુધીમાં 10 લોકોના મોત થઇ ચૂક્યા છે. શહેરમાં સતત ડેન્ગ્યૂ અને ચિકનગુનિયા, મલેરિયાના કેસો વધતા સુરત મહાનગરપાલિકાનું આરોગ્ય વિભાગ હરકતમાં છે.

• વિવિધ રોગમાં આશરે 525થી પણ વધુ દર્દીઓ હાલ સારવાર હેઠળ
• પાણીજન્ય તેમજ મચ્છરજન્ય રોગોના કેસ મોટા પ્રમાણમાં નોંધાયા
• નવી સિવિલ હોસ્પિટલમાં મલેરિયાના 85 અને ડેન્ગ્યૂના 85 કેસો

સુરત: શહેરમાં રોગચાળો વકર્યો છે. સુરત શહેરના અનેક વિસ્તારોમાં પાણીજન્ય અને મચ્છરજન્ય રોગચાળો બેકાબૂ બની રહ્યો છે. સુરતમાં વધુ બે વ્યક્તિઓને રોગચાળો ભરખી ગયો છે. વિવિધ રોગમાં આશરે 525થી પણ વધુ દર્દીઓ હાલ સારવાર હેઠળ છે. સિવિલ હોસ્પિટલમાં કેટલાક વોર્ડ હાઉસફૂલ પણ થઈ ગયા છે.

સિઝનમાં ઝાડા-ઊલટીના 619 કેસ નોંધાયા

સુરતના પાંડેસરામાં ત્રણ વર્ષના બાળકનું ઝાડા ઉલટી બાદ મોત નીપજ્યું છે. જ્યારે ગણેશનગરમાં 2 દિવસમાં ઝાડા ઊલટી બાદ 2ના મોત થયા હતા. ઝાડા ઉલટી થયા બાદ બેભાન થઈ જતા બાળકને સારવાર માટે નવી સિવિલ હોસ્પિટલમાં ખસેડાયો હતો. સુરતમાં રોગચાળાનું પ્રમાણ વધ્યું છે. સપ્ટેમ્બર માસમાં ઝાડા-ઊલટીના 96, ટાઇફોઇડના 32 અને કમળાના 15 કેસ નોંધાયા છે. છેલ્લા 9 મહિનામાં ઝાડા-ઊલટીના 619, ટાઇફોઇડના 216 અને કમળાના 80 કેસ નોંધાયા છે. નવી સિવિલ હોસ્પિટલમાં હાલના દિવસોમાં મલેરિયાના 85 અને ડેન્ગ્યૂના 85 કેસો નોંધાઈ ચૂક્યા છે.