સુરત: દર વર્ષે સુરતમાં મોટાપાયે ગરબાના આયોજનો કરનાર હિરેન કાકડીયા અને ડેનિભાઈએ જણાવ્યું કે, રાજ્ય સરકાર ભલે છૂટછાટ અને નિયંત્રણ સાથે નવરાત્રીના આયોજનો કરવાની પરવાનગી આપે, પરંતુ આયોજકો પાસે તેટલો સમય હવે રહ્યો નથી. દર વર્ષે મોટાપાયે અયોજનો 6 માસ અગાઉ તૈયારીઓ શરૂ કરી દેવામાં આવે છે. જેમાં જાહેરાત અને સ્પોન્સરશિપ પણ શોધવી પડે છે. જો કે હવે એટલો સમય નથી રહ્યો કે જાહેરાતો અને સ્પોન્સરશીપવાળી કંપનીને શોધી શકાય. કોરોનાની મહામારી વચ્ચે હાલના સંજોગોમાં સ્પોન્સરશિપ મળવું પણ મુશ્કેલ બન્યું છે. જેથી આ વખતના આયોજનો માંડી વળવામાં આવ્યા છે. જો કે શેરી ગરબાના આયોજનને પરવાનગી આપવામાં આવવી જોઈએ, જેથી નાના વેન્ડરને રોજગારી પણ મળી શકે.
દર વર્ષે નવરાત્રી દરમ્યાન ગરબાના મોટા-મોટા આયોજનો થતા હોય છે. કોમર્શિયલ ગરબાની સાથે શેરી ગરબાના આયોજનો ઠેર-ઠેર જોવા મળતા હોય છે. જો કે આ વખતે કોરોનાની મહામારીના કારણે નવરાત્રિના આયોજનોને પણ મોટું ગ્રહણ નડે તેવી પૂરેપૂરી સંભાવના છે. રાજ્ય સરકાર દ્વારા નવરાત્રીના આયોજનો કરવા અંગે વિચારણા કરવામાં આવી રહી છે. જેથી લોકોને આશા છેકે સરકાર કેટલીક છુટછાટ સાથે ગરબાના આયોજનો ની પરવાનગી આપશે.
પરંતુ જો ગરબાના આયોજનો થાય તો કોરોનાનું સંક્રમણ વધે તેવી શક્યતાઓ પણ રહેલી છે. જેથી સુરતના ખેલૈયાઓ દ્વારા પ્રાચીન સમયે જે ગરબા યોજાતા હતા, તે રીતે અર્વાચીન ગરબાનું આયોજન કરવાનું વિચારી રહ્યા છે. જ્યાં માત્ર શેરીની વચ્ચે માતાજીનો ફોટો મુકી દરેક લોકો ઘરની બાલ્કનીમાંથી તાળી અને ચપટી વગાડી માં અંબેની આરાધના કરે તેવી લાગણી સુરતના ખેલૈયાઓ દ્વારા વ્યકત કરવામાં આવી છે.
