સુરતઃ કોસમાડા ગામમાં જમીન-સંપાદનની પ્રક્રિયા અંગે ખેડૂતોનો વિરોધ, તંત્રએ ઊભા પાક પર બુલડૉઝર ફેરવ્યું

કેન્દ્ર સરકારના ગુડ્સ ટ્રેન કોરિડોર માટે રેલવે વિભાગ દ્વારા ઉમરાથી ઉધના જંક્શન સુધી જમીન સંપાદન કરવાની પ્રક્રિયા હાથ ધરવામાં આવી છે. જોકે, ગત રોજ કોસમાડા ગામ નજીક આવેલી જમીનોની સંપાદન પ્રક્રિયા દરમિયાન શેરડીના ઉભા પાક પર રેલવે વિભાગે બુલડોઝર ફેરવી દેતા ખેડૂતોમાં રોષ ફાટી નીકળ્યો છે. જેના વિરોધમાં મંગળવારે ખેડૂતોએ રેલવે અધિકારીઓને કોસમાડા ગામ નજીક ઘેર્યા હતા આથી તેની સંપાદનની કામગીરી અટકાવી દેવામાં આવી હતી.

• રેલવે ગુડ્સ ટ્રેન કોરિડોર પ્રોજેક્ટ
• જમીન સંપાદનની કામગીરી દરમિયાન વિવાદ
• ઉભા પાક પર અધિકારીઓએ ફેરવ્યું બુલડોઝર

સુરત : વર્ષ 2011થી અટકી પડેલી રેલવે ગુડ્સ ટ્રેન કોરિડોરની જમીન સંપાદન પ્રક્રિયાની કામગીરી હાલ રેલવે વિભાગ દ્વારા હાથ ધરવામાં આવી છે. જો કે, અસરગ્રસ્ત 150 જેટલા ખેડૂતોએ જમીન સંપાદનની આ પ્રક્રિયા સામે વાંધો ઉઠાવ્યો છે. ખેડૂતોએ આક્ષેપ કર્યા છે કે સુપ્રીમ કોર્ટનો અનાદર કરીને રાજ્ય સરકારની વેલ્યુએશન પ્રમાણે જમીન સંપાદનનું વળતર ખેડૂતોને ચૂકવવાના બદલે રેલવે વિભાગ જોહુકમી ચલાવી જમીનનો કબજો મેળવી રહ્યું છે. જમીન સંપાદન વખતે ખેડૂતોના ઉભા પાક પર પણ બુલડોઝર ફેરવી દેવામાં આવ્યું છે જે અયોગ્ય છે.

જમીન સંપાદનની પ્રક્રિયાને લઈ ભારે વિરોધ

ઉમરાથી ઉધના જંક્શન સુધી રેલવે વિભાગ દ્વારા ગુડ્સ ટ્રેન કોરિડોર પ્રોજેક્ટ અંતર્ગત કરવામાં આવી રહેલી જમીન સંપાદન પ્રક્રિયાને મુદ્દે દક્ષિણ ગુજરાત ખેડૂત સમાજના આગેવાન તેમજ અન્ય અસરગ્રસ્ત તમામ ખેડૂતોએ ભારે વિરોધ સાથે જિલ્લા ક્લેક્ટરને આવેદન આપ્યું હતું. જેમાં તેમણે જણાવ્યું હતું કે, તેમને જમીન ફાળવણી માટે મુદત આપવામાં આવે. જો કે ખેડૂતોની આ માગને જિલ્લા કલેક્ટર દ્વારા ફગાવી દેવામાં આવી હતી. જેના જવાબમાં ખેડૂતોએ ચીમકી આપતા જણાવ્યું છે કે જમીન સંપાદન તો નહીં જ થવા દઈએ. ખેડૂતોની આ લડત ચાલુ રહેશે. આમ, કલેક્ટરને કરવામાં આવેલી રજૂઆતનો કોઇ નિવેડો આવ્યો નથી.

સંપાદન અધિકારીઓએ પંચનામું પણ કર્યું નહી

સંપાદનના સમયે સંપાદન અધિકારીઓએ કોઈપણ પ્રકારનું પાકનું પંચનામું કર્યું નથી. જેથી ખેડૂતો કોસમાડા ગામ નજીક એકઠા થયા હતા. તેમજ રેલવે વિભાગના અધિકારીને ઘેરી વિરોધ નોંધાવ્યો હતો. જ્યાં પોલિસ અને ખેડૂતો વચ્ચે ઘર્ષણની સ્થિતિ જોવા મળી હતી.

રજૂઆતને અવગણવામાં આવતા વિરોધ ચાલુ રાખવાની ચીમકી

ખેડૂતોએ રેલવે વિભાગના અધિકારીઓને 10 દિવસનો સમય આપવા માંગ કરી હતી. ખેડૂતો ખેતરોમાં પોતાનો ઉભો પાક લઈ શકે તે માટે પણ સમયની માગ કરાઈ હતી. પરંતુ અધિકારીઓએ તૈયાર પાક પર બુલડોઝર ફેરવી દેતા ખેડૂતો રોષે ભરાયા હતા. જમીનનો કબજો લેતા સમયે પંચ કેસ કરવામાં આવ્યો નથી તે અંગેની રજૂઆત પણ કરવામાં આવી હતી. ખેડૂતોને ન્યાય મળે તે માટે કલેક્ટરને આજીજી કરાઈ હતી. જ્યાં આખરે ખેડૂતોની રજૂઆતને અવગણવામાં આવતા ખેડૂતોએ પોતાનો વિરોધ અને લડત ચાલુ રાખવાની ચીમકી ઉચ્ચારી છે.