કોરોના વોરિયર્સની કામગીરીની સરાહના માટે એન્ટિબેક્ટેરિયલ ફેબ્રિકની રાખડી બનાવવામાં આવી

રક્ષાબંધનને ગણતરીના દિવસો બાકી છે. કોરોના કાળમાં ખડેપગે ફરજ બજાવી રહેલાં કોરોના વોરિયર્સની કામગીરીની સરાહના માટે એન્ટિબેક્ટેરિયલ ફેબ્રિકની રાખડી બનાવવામાં આવી છે. સેનેટાઇઝ રાખડીમાં કપરા સમયે લોકોની સેવા કરનાર લોકો સામેલ છે. સાથે સેનટાઈઝર સહિત માસ્ક પણ બનાવવામાં આવ્યાં છે.આ ખાસ રાખડી સુરતની પૂજા જૈન દ્વારા તૈયાર કરવામાં આવી છે. જે PM મોદી, સોનુ સુદ અને સુરતમાં કોરોના પોઝિટિવ દર્દીના મૃતદેહનો અંતિમ સંસ્કાર કરનાર અબ્દુલભાઈને આપશે.

સુરતઃ માર્ચ મહિનાથી શરૂ થયેલા કોરોનાકાળથી લઈને અત્યાર સુધી કોરોના વોરિયર્સ ખડેપગે પોતાની ફરજ બજાવી રહ્યાં છે અને લોકોને ઘરમાં સુરક્ષિત રહેવા માટે જણાવી રહ્યાં છે. છતાં પણ સુરતમાં વધી રહેલા કેસોની સંખ્યા લોકોની લાપરવાહી દર્શાવી રહી છે. વળી કોરોના પોઝિટિવ દર્દીઓની ટ્રીટમેન્ટ કરતાં ઘણા કોરોના વોરિયર્સ કોરોનાના સંક્રમણમાં આવી રહ્યાં છે .ત્યારે સુરતની પૂજા જૈન દ્વારા કોરોના વોરિયર્સની કામગીરીની સરાહના થઈ શકે અને લોકોમાં વધુ જાગૃતતા આવી શકે એ માટે જૂથ અને એન્ટી બેક્ટીરિયલ ફેબ્રિકની રાખડી બનાવવામાં આવી છે. આ રાખડી પર કોરોના વોરિયર્સ એવા નર્સ, ડોક્ટર, પોલીસ અને અંતિમક્રિયા કરાવનાર વોરિયર્સ તેમજ અન્ય વોરિયર્સ વિશે સ્લોગન લખીને તેમનો આભાર માનવામાં આવ્યો છે.

કોરોના વોરિયર્સની કામગીરીની સરાહના માટે એન્ટિબેક્ટેરિયલ ફેબ્રિકની રાખડી બનાવવામાં આવી

આવા કપરા સમયમાં પોતાના પરિવારની ચિંતા કર્યા વગર સતત છેલ્લા ત્રણ મહિનાથી ફરજ બજાવી રહેલાં કોરોના વોરિયર્સને કૃત્યર્થ ભાવ વ્યક્ત કરવા પૂજાએ પોતે 50 થી વધુ રાખડીઓ બનાવી છે. જેમાં વડાપ્રધાન નરેન્દ્ર મોદી, લોકડાઉન દરમ્યાન હજારોની સંખ્યામાં પરપ્રાંતી શ્રમિકોને તેમના વતન મોકલનાર સોનુ સુદ, સુરતના એકતા ટ્રસ્ટના પ્રમુખ અબ્દુલ મલબારી કે જેઓ કોરોના દર્દીઓની અંતિમવિધિ કરે છે,તેવા તમામની તસવીરો સાથે ઇકો ફ્રેન્ડલી રાખડી બનાવી છે. રાખડીમાં સેનેટાઈઝરની નાની બોટલ પણ જોવા મળશે. તો માસ્ક બનાવી જનજાગૃતિનો પ્રયત્ન પણ કરવામાં આવ્યો છે. આ તમામ રાખડી કોરોના વોરિયર્સને પૂજા જૈન કુરિયર કરી રક્ષાબંધનના પર્વ પર મોકલશે અને કોરોનાને લઈ દેશની રક્ષા કરી રહેલા કોરોના વોરિયર્સનો આભાર માનશે.

પૂજા જૈનના જણાવ્યાનુસાર આ રાખડી ખાસ કરીને લોકો કોરોના વોરિયર્સ પ્રત્યે આભાર વ્યક્ત કરવા હેતુથી બનાવવામાં આવી છે. સેફટીના મુદ્દાને સમજી વધુમાં વધુ લોકો માસ્ક પહેરે અને સેનેટાઈઝરનો પૂરતો ઉપયોગ કરે એ વાતને ધ્યાનમાં રાખીને રાખડી જૂથ અને એન્ટીબેક્ટેરિયલ ફેબ્રિકથી બનાવવામાં આવી છે. રાખડી સંપૂર્ણ રીતે સેનેટાઇઝ છે જેથી પહેરી શકાય. જે પીએમ મોદી, સોનુ સુદ સહિત કોરોના વોરિયર્સને મોકલી આભાર વ્યક્ત કરાશે.