વર્લ્ડ હેરિટેઝ વિકની શરૂઆત થતાની સાથે જ, સુરત સ્થિત 400 વર્ષ જૂના કિલ્લાનું નવીનીકરણ શરૂ કરવામાં આવ્યું છે. આ કિલ્લો ડચ, બ્રિટિશ અને મુધલ કાળને જીવંત રાખે છે. લોકો તેને જોવા માટે દુર-દુરથી આવતા નજરે ચડે છે. અમેરિકામાં કેમેસ્ટ્રીનો અભ્યાસ કરનાર વિદ્યાર્થિની પણ આ કિલ્લાથી દુર ન રહી શકી અને આવી પહોંચી સુરત. ઐતિહાસિક કિલ્લાને જોતાની સાથે જ અમેરિકી શર્લિન પણ wow શબ્દનો ઉચ્ચાર કરી કિલ્લાની ફેન બની ગઇ હતી.
પ્રાચીન બોટ અને હાઇડ્રોલિક ગેટના દરવાજા વાળો કિલ્લો પોતાનો એક ઈતિહાસ ધરાવે છે. ઈ.સ.1300માં પોર્ટુગીઝ સામે રક્ષણ કરવાના હેતુથી બનાવવામાં આવેલ આ કિલ્લાની દિવાલો એટલી અડીખમ હતી કે, મુઘલ બાદશાહ અકબરને પણ આ કિલ્લા પર વિજય ધ્વજ ફરકાવવા માટે 47 દિવસનું યુદ્ધ કરવું પડ્યું હતું. તેની મજબુતીના કારણે જ કદાચ આઝાદી બાદ અહિંયા સરકારી ઓફિસો શરૂ કરવામાં આવી હતી.
સુરતના ઈતિહાસનો મહત્વપૂર્ણ ગણાતો આ કિલ્લો જૂની જર્જરિત ઇમારતને બદલે શાનદાર સુંદરતાથી સજ્જ થઈ રહ્યો છે. અત્યાર સુધી લોકો માત્ર આ કિલ્લા અંગે વાંચતા અથવા સાંભળતા આવ્યા છે. પરંતુ હવે મહાનગરપાલિકાના નવીનીકરણના નિર્ણય બાદ સુરતીઓ સહિત દેશ-વિદેશના લોકો કિલ્લાના ઈતિહાસને નિહાળી શકશે. આ કિલ્લામાં ઐતિહાસિક ડિઝાઇનના ફર્નિચર, ટ્રાવેલર ગેલરી, ઓડિયો વિઝ્યુઅલ રૂમ, ડચ ગેલરી અને બ્રિટિશ સ્ટાઇલનો ટી-સર્વ રૂમ પણ આવેલો છે.
