- ફૂટપાથ પર બાળકો અભ્યાસ કરે છે
- સેલવાસ નગરપાલિકા સંચાલિત શાળામાં શિક્ષકોને આદેશ
- અભ્યાસ ના બગડે તે માટે શિક્ષકો ઘરે જઈ અભ્યાસ કરાવે
સેલવાસઃ સેલવાસ નગરપાલિકા સંચાલિત સ્કૂલોના શિક્ષકોએ ઘરે જઈ બાળકોને ભણાવવાનુ શરુ કર્યું છે. જેમાં કેટલીક જગ્યાઓ પર શિક્ષકો દ્વારા વિદ્યાર્થીઓને ફૂટપાથ પર બેસાડીને ભણાવતા હોવાનું સામે આવ્યું છે. જ્યારે આ રીતે કરાવતા અભ્યાસથી વાલીઓમાં નારાજગી વ્યાપી છે.
લોકડાઉન બાદ સૌથી મોટું નુકશાન વિદ્યાર્થીઓને થયુ છે. જેને ધ્યાનમા રાખી સરકારી તેમજ ખાનગી શાળાઓએ ઓનલાઈન ભણાવવાનુ શરૂ કર્યું છે. સરકારી શાળાઓમાં પણ ઓનલાઈન ભણતર ચાલી રહ્યુ છે. એની સાથે કેટલાક બાળકોનો અભ્યાસ બગડી રહ્યો છે. જે ધ્યાને આવતા સેલવાસ પાલિકા સંચાલિત શાળાઓના શિક્ષકોને આદેશ આપી સવારથી બપોર સુધીના સમયમા આવતા તેમજ બપોરથી સાંજ સુધીના સમયમા આવતા વિદ્યાર્થીઓને ઘરે ઘર જઈ એમને જે ઓનલાઈન સમજાયુ ન હોય એ વિષય ભણાવવાનું સુચન કરવામાં આવ્યું હતું.
બગીચામાં કે ફૂટપાથ પર અપાય છે શિક્ષણ
આ આદેશ બાદ કેટલાક શિક્ષકો નાનામોટા બગીચામા બેસાડી વિદ્યાર્થીઓને ભણાવી રહ્યા છે. તો કેટલાક શિક્ષકો રોડ કિનારે આવેલા ફૂટપાથ પર વિદ્યાર્થીઓને બેસાડી ભણાવી રહ્યા છે. શિક્ષકોની આ રીતથી વિદ્યાર્થીઓના વાલીમાં રોષ જોવા મળ્યો છે. તેમજ કેટલાક વાલીઓએ શિક્ષકોને ફરિયાદ પણ કરી હતી.
શાળામાં જ નિયમોનું પાલન કરી અભ્યાસ કરાવે
વાલીઓના જણાવ્યા અનુસાર શિક્ષકો ઘર નજીક ભણાવવા આવે છે એ સારી વાત છે. પણ કોઈ કાયમી જગ્યા હોતી નથી. બાળકોએ રોજ અલગ અલગ જગ્યા પર ભણવા જવુ પડે છે. ચાલીઓમા તો હાલત વધુ ખરાબ છે એના કરતા સ્કૂલોમા જ થોડા થોડા વિદ્યાર્થીઓને ભણાવવા વધુ સારુ રહેશે. તે માટે પ્રશાસને વ્યવસ્થા ઉભી કરવી જોઈએ.
