રાજકોટ: ગૃહ રાજ્યપ્રધાન પ્રદીપસિંહ જાડેજાએ કહ્યું હતું કે "રાજ્યના નાગરિકોની સુરક્ષા એ જ અમારો નિર્ધાર છે જેમાં અસામાજિક તત્વોને કડક સજા થાય અને ચોરી/ધાડ અટકે તે માટે ગુજરાત પોલીસ દ્વારા રાજ્યભરમાં સરાહનીય કામગીરી થઇ રહી છે. રાજકોટ LCB દ્વારા કાસ્ટિંગની ચોરી/ધાડ પાડતી આંતરરાજ્ય મેવાતી ગેંગના 15 સભ્યોને પકડી પાડવામાં આવ્યા છે જે અભિનંદનને પાત્ર કાર્ય છે."
આ આંતરરાજ્ય મેવાતી ગેંગ દ્વારા 10 રાજ્યોમાં ચોરી કરી હોવાની કબૂલાત પણ સભ્યોએ આપી છે. આ તમામ સભ્યો સામે ધાડપાડુનો ગુનો દાખલ કરવામાં આવ્યો છે. આ ગેંગની ધાડ માટેની સ્ટ્રેટેજી એવી હતી કે કોઈપણ ખાનગી કે સરકારી કામ ચાલતું હોય ત્યાં તેઓ ટ્રક દ્વારા કાસ્ટિંગની પાઇપોની ચોરી કરી લેતા જેથી કોઈને ખ્યાલ જ ન આવે કે આ લોકો ચોરી કરી રહ્યાં છે કે માલ સામાન ભરવા કે ઉતારવા આવ્યા છે.
પરંતુ રાજકોટ LCB પોલીસની ચપળતાના કારણે આ ભેદ ઉકેલી લેવાયો છે અને આ ગેંગ પાસેથી રૂ.45.33 લાખનો ટ્રક અને મોબાઈલ સહિતનો મુદ્દામાલ પણ જપ્ત કરી લેવાયો છે. ગુરુવારે LCB રાજકોટને બાતમી મળી હતી કે આંતરરાજ્ય ગુનાઓ આચરતી ગેંગના 15 સભ્યો ઘાતક હથિયારો સાથે ધાડ કરવાના છે આથી આ ગેંગને રાજકોટ, પોરબંદર નેશનલ હાઈવે પરથી પકડી પાડવામાં આવ્યા છે અને તેમની સામે કાયદેસરનો ગુનો નોંધીને તમામની અટકાયત કરવામાં આવી છે.
આ તમામ આરોપીઓ મોટાભાગે રાજસ્થાન અને હરિયાણાના છે જેમણે તપાસ દરમિયાન 14 ગુનાઓની કબુલાત કરી છે અને ચાર ગુનાઓ ડિટેક્ટ થયા છે.
