19 દિવસની માસુમ પુત્રીને દાદીએ ઝેર પીવડાવી દેતા અરેરાટી

રાજકોટઃ જિલ્લાના ગોંડલના મોવિયા રોડ ઉપર 19 દિવસની માસુમ બાળાનું શંકાસ્પદ મોત નિપજ્યાની ઘટનામાં પોલીસે ગણતરીની કલાકોમાં જ આરોપી બાળાના દાદીની ધરપકડ કરી કાર્યવાહી હાથ ધરી હતી.

ચૈત્ર નવરાત્રીનો પ્રારંભ થઇ ગયો છે. ત્યારે લોકો માસૂમ બાળા અને કુમારિકાઓમાં માઁ આદ્યશક્તિના દર્શન કરતા હોય છે, ત્યારે ગોંડલના મોવિયા રોડ ઉપર જનતા સોસાયટીમાં રહેતા કેતનભાઇ રણછોડભાઈ રૈયાણીની 19 દિવસની માસુમ પુત્રી કિંજલને તેના જ દાદીમાં શાંતાબેને ઝેરી દવા પીવડાવી મોતને ઘાટ ઉતારી દેતા અરેરાટી વ્યાપી જવા પામી હતી. પોલીસે ગણતરીની કલાકોમાં જ આરોપી 60 વર્ષીય શાંતાબેનની ધરપકડ કરી કાર્યવાહી હાથ ધરી હતી.

કાળજુ કંપાવી નાખે તેવી આ ઘટનાની વધુ વિગતમાં કેતનભાઇ રૈયાણી હીરા-ઘસવાનું કામ કરી રહ્યા છે. 19 દિવસ પહેલા જ તેમને ત્યાં બીજી પુત્રી કિંજલનો જન્મ થયો હતો અને ગતરોજ કિંજલ વધુ કજીયા કરતી હોય તેથી સારવાર માટે હોસ્પિટલે ખસેડાઇ હતી. જ્યાં તેનું મોત નિપજતા કેતનભાઇ દ્વારા કિંજલને દાદીમા દ્વારા પીવડાવવામાં આવેલા ટીપામાં ઝેર હોવાની શંકા વ્યક્ત કરાઇ હતી. જેના આધારે શહેર પોલીસના પી.આઈ કે.એન રામાનુજ દ્વારા તપાસ હાથ ધરાતાં આરોપી શાંતાબેનની પૂછપરછ કરાતા જણાવ્યું હતું કે કેતનને સંતાનમાં એક પુત્રી તો હતી જ, જ્યારે આ બીજી પુત્રી અવતરતા તે જોઇતી ન હતી. આથી કિંજલના કજીયાની દવાની શીશીમાં ઝેર મિલાવી દીધેલું હતું. જે બાદ કિંજલને પીવડાવી દેતા તેનું મોત નીપજ્યું હતું.